Pasi kanë mbushur rrugët e Tiranës për të protestuar kundër arrogancës së qeverisë, korrupsionit, mungesës sëshërbimeve, rritjes së çmimeve dhe skandaleve me pronat në zonat e mbrojtura, protestuesit e “Revolucionit Flamingo” kanë vendosur të ndryshojnë strategji. Ata po kalojnë nga tubimet në terren, drejt një beteje të mirëfilltë institucionale që synon të godasë burimin e pushtetit, që është sistemi zgjedhor.
Zoom.al po publikon dokumentin zyrtar të protokolluar në Komisionin Qendror të Zgjedhjeve (KQZ), i cili mban vulën e datës 3 qershor 2026 (Nr. 1426 Prot.). Një grup prej 10 nismëtarësh, nën logon “Veprimi Qytetar për Demokraci Funksionale”, i janë drejtuar zyrtarisht institucionit me kërkesën për t’u pajisur me fletët tip. Synimi i tyre është një nismë ligjvënëse nga vetë zgjedhësit për të ndryshuar nga rrënjët Kodin Zgjedhor të Republikës së Shqipërisë.
Në listën e dorëzuar në KQZ bien në sy emra mjaft të njohur të jetës publike, ekspertë, gazetarë dhe aktivistë të cilët kanë mbajtur peshën kryesore të reagimit qytetar gjatë javëve të fundit.
Në listë rreshtohen gjithashtu edhe emrat e Edmond Çatës, Etleva Merkos, Gerta Metës, Ilir Alisë dhe Silvana Bellos, të gjithë të angazhuar në këtë lëvizje qytetare.
Hapi i ndërmarrë nga protestuesit është një proces me rregulla të rrepta ligjore. Sipas ligjit nr. 54/2019 “Për nismën ligjvënëse të zgjedhësve”, sapo KQZ-ja t’i pajisë nismëtarët me fletët tip, ata kanë 3 muaj kohë për të zbritur në terren dhe për të mbledhur firmat e nevojshme të qytetarëve në të gjithë vendin.
Ky hap tregon se pas indinjatës për Zvërnecin, rrënimin e shëndetësisë e arsimit, korrupsionin dhe çmimet jashtë kontrollit, lëvizja qytetare ka kuptuar se rrënja e problemit qëndron te mënyra se si funksionon parlamenti dhe si fitohen votat përmes Kodit aktual Zgjedhor.
Dorëzimi i këtij dokumenti vjen në një moment kur kryeministri Edi Rama ka zgjedhur të sulmojë dhe të ironizojë protestuesit, duke i quajtur “blogerë që nuk paguajnë taksa” apo “urrejtës të Trump-it”. Mirëpo, ky hap tregon se lëvizja nuk po udhëhiqet nga thjesht nga blogerët, por nga qytetarë që po kërkojnë të kthejnë sovranitetin te populli.
Projektligji i ri, i cili shoqërohet me një relacion të plotë shpjegues, pritet të kërkojë thyerjen e monopolit të kryetarëve të partive të mëdha, hapjen e plotë të listave dhe rregulla të reja që garantojnë votën e lirë. /Zoom.al
