Zbardhen detaje të reja për vrasjen e 22-vjeçares shqiptare Ilaria Sula në Itali nga ish-i dashuri i saj filipinas, Mark Samson.
Mediat italiane raportojnë se para se ta vriste, ai kishte tentuar të hynte në shtëpinë e saj dhe të merrte kompjuterin e Ilarias. Më vonë atë mbrëmje, Ilaria shkoi në banesën e tij në rrugën Homs, ku dyshohet se ndodhi vrasja.
Mark Samson fillimisht përmendi xhelozinë si motiv, megjithatë djali me të cilin ai dyshonte se Ilaria kishte lidhje, ka deklaruar se nuk e kishte takuar kurrë personalisht, por kishin shkëmbyer vetëm disa mesazhe.
Pas vrasjes, Samson mbajti telefonin e Ilarias për një javë dhe dërgoi mesazhe të rreme te miqtë e saj, duke pretenduar se ajo ndodhej në Napoli.
“Jam në Napoli, po argëtohem por kam humbur trenin”, shkruante Mark Samson në emër të Ilarias, duke iu referuar pamundësisë së kthimit në Terni siç u kishte premtuar prindërve.
Autoritetet italiane po hetojnë gjithashtu rolin e nënës së autorit, e cila kishte shprehur hapur se nuk e donte Ilariën në shtëpi, pasi i shpërqendronte të birin. Ajo do të merret në pyetje ditën e nesërme.
Në qendër të hetimeve janë tani detajet rreth motiveve dhe bashkëpunimit të mundshëm të familjes së autorit./ Zoom.al
