Projekti i ndërtimit të kompleksit gjigant “Durrës Marina”, në territorin e Portit të Durrësit, po shndërrohet në një nga skandalet më të mëdha të dyshuara për korrupsion institucional në Shqipëri.
Pas këtij projekti dyshohet se fshihet një aferë që përfshin drejtpërdrejt kryeministrin Edi Rama, biznesmenin nga Emiratet e Bashkuara Arabe Mohamed Alabbar dhe disa figura kyçe të administratës shtetërore.
Një skemë e mirëmenduar me kompani offshore dhe pushtet shtetëror
Për realizimin e projektit, në janar 2023 u krijua kompania koncesionare “Durrës Marina Sh.A.”, me 67% të kapitalit në pronësi të “Eagle Hills Real Estate Development” – një kompani offshore e Alabbar – dhe 33% të aksioneve në pronësi të shtetit shqiptar, përmes kompanisë publike “Albanian Seaports Development”.
Në krye të “Durrës Marina” u emërua Dhimitraq Mili, i lidhur me kompaninë “Gener 2” të biznesmenit Bashkim Ulaj, ndërsa përfaqësues i shtetit shqiptar në këtë kompani u caktua Erlis Hereni.
Refuzimi për të firmosur bilance të falsifikuara dhe shkarkimi
Pas kallëzimit penal të Partisë Demokratike në SPAK për dyshime mbi këtë koncesion, Hereni refuzoi të firmoste bilance që, sipas burimeve, përmbanin të dhëna të falsifikuara mbi investime, transferta dhe arkëtime. Ai gjithashtu kundërshtoi zgjerimin e sipërfaqes së ndërtimit me 70 mijë m² shtesë, përtej 810 mijë m² që ishin dhënë fillimisht.
Në korrik 2024, Pirro Vengu, atëherë drejtor i Portit të Durrësit dhe sot ministër në kabinetin Rama, e shkarkoi Herenin nga detyra, duke e paraqitur largimin si “dorëheqje”. Ndryshimi u mbajt i fshehtë dhe u pasqyrua zyrtarisht në Qendrën Kombëtare të Biznesit vetëm në vitin 2025.
Shpërblim me post diplomatik
Pas largimit, Hereni u emërua sekretar në Misionin e Shqipërisë në OKB – një lëvizje që burime pranë opozitës e interpretojnë si “shpërblim për heshtjen”. Në vend të tij në “Durrës Marina” u emërua Alban Binaj, i afërm i Ilir Binajt, Drejtor i Përgjithshëm i Tatimeve, institucion që mbikëqyr ligjshmërinë fiskale të kompanisë.
Reagimet dhe heshtja institucionale
Deri tani, as SPAK, as Drejtoria e Tatimeve nuk kanë ndërmarrë veprime publike mbi këtë çështje. Ndërkohë, projekti në Durrës vazhdon të zgjerohet, përtej kufijve të parashikuar në marrëveshjen fillestare.
Opozita ka paralajmëruar kallëzime të reja penale dhe kërkon ndërhyrjen e partnerëve ndërkombëtarë për transparencë mbi këtë projekt, që konsiderohet si një nga më të mëdhenjtë e ndërtimit në Ballkanin Perëndimor.
Homazhet për gazetarin Enrik Mehmeti, Aurela Gaçe me lot në sy: Do e mbaj premtimin
