Aktorja irlandeze Brenda Fricke është ndarë nga jeta.
Lajmi për vdekjen e saj u konfirmua nga agjenti i saj, Phil Belfield, i cili e cilësoi si një artiste të rrallë dhe një personazh që do të mbetet gjithmonë në zemrat e publikut.
Aktorja, e cila ishte 81 vjeçe, la pas një karrierë të gjatë në film dhe televizion, duke u vlerësuar ndër vite për talentin dhe interpretimet e saj.
Brenda Fricker hyri në historinë e kinemasë në vitin 1990, kur fitoi çmimin Oscar për “Aktorja më e Mirë në Rol Dytësor” për interpretimin e saj në filmin “My Left Foot”. Me këtë arritje, ajo u bë aktorja e parë irlandeze që fitoi një Oscar në këtë kategori.
Në këtë film, Fricker luajti rolin e nënës së personazhit kryesor, Christy Brown, një artist irlandez i cili, pavarësisht kufizimeve të rënda fizike, arriti të shprehte talentin e tij përmes këmbës së majtë. Filmi u vlerësua gjerësisht dhe solli gjithashtu një Oscar për aktorin Daniel Day-Lewis.
Për publikun e gjerë, Brenda Fricker mbetet e paharruar edhe për rolin e gruas së zogjve në filmin “Home Alone 2: Lost in New York”, ku krijoi një nga skenat më të dashura të filmit së bashku me personazhin e Kevin McCallister, të interpretuar nga Macaulay Culkin.
Aktorja pati gjithashtu një rol të rëndësishëm në serialin britanik “Casualty”, ku interpretoi infermieren Megan Roach. Ajo ishte pjesë e këtij produksioni për shumë vite dhe u bë një nga figurat më të dashura të ekranit televiziv britanik.
Gjatë karrierës së saj, Fricker mori pjesë në shumë produksione të njohura, mes tyre “So I Married an Axe Murderer”, “Angels in the Outfield”, “A Time to Kill” dhe “Veronica Guerin”./ Zoom.al
