Kryeministria ka folur mbi arsyet e largimit të Belinda Ballukut nga posti i zv.kryeministres dhe Ministres se Infrastrukturës. Agjencia e Lajmeve Reuters arriti t’i marrë një prononcim zëdhënëses së qeverisë, Manjola Hasa. Ajo dha një variant të largimit, pa përmendur faktin se ky qe një largim i detyruar si pasojë e hetimeve të SPAK dhe presionit ndërkombëtar. Reuters shkruan se pas shkarkimit tani është radha e Parlamentit të vendosë për imunitetin e Ballukut.
Artikulli i Reuters: Kryeministri shqiptar shkarkon zëvendësen teksa thellohet hetimi për korrupsion
Kryeministri shqiptar Edi Rama, vonë të enjten, shkarkoi zëvendësen e tij, Belinda Balluku, e cila përballet me akuza për manipulim të tenderëve publikë, pretendime që kanë nxitur protesta nga opozita.
Prokuroria e Posaçme kundër Korrupsionit dhe Krimit të Organizuar, e njohur si SPAK, e mori të pandehur Ballukun në dhjetor, nën dyshimin se ka ndërhyrë në dhënien e dy kontratave ndërtimi në vitin 2021, me vlerë mbi 200 milionë euro.
Parlamenti pritet të vendosë më 5 mars nëse do t’i heqë asaj imunitetin, çka do t’i hapte rrugë SPAK-ut për ta arrestuar. Shqipëria, e cila synon të anëtarësohet në Bashkimin Evropian deri në vitin 2030, përballet me presion nga blloku për të luftuar korrupsionin.
Balluku, e cila mbante postet e zëvendëskryeministres dhe ministres së Infrastrukturës, i mohon akuzat.
Rama, i cili është në pushtet që nga viti 2013, e kishte mbështetur atë për muaj me radhë dhe nuk dha një arsye për shkarkimin e saj të enjten, në kuadër të një riorganizimi të shtatë posteve në administratën e tij socialiste, përfshirë ministrat e Mbrojtjes dhe të Jashtëm.
“Kryeministri e ka sqaruar që në fillim të këtij mandati se riorganizimet mund të jenë më të shpeshta, ndërsa gjatë gati katër muajve të fundit ai ka refuzuar tri herë dorëheqjen e zonjës Balluku,” tha zëdhënësja e qeverisë, Manjola Hasa, në një deklaratë me email për Reuters.
Balluku është parë si një yll në ngjitje, e favorizuar nga Rama si një pasardhëse e mundshme. Që nga momenti i marrjes së saj të pandehur, partia më e madhe opozitare në vend, Partia Demokratike, ka organizuar protesta duke kërkuar dorëheqjen e Ramës, qeveria e të cilit është goditur nga disa skandale korrupsioni gjatë vitit të kaluar.
Protestuesit kanë hedhur bomba molotov, ndërsa policë dhe demonstrues kanë mbetur të plagosur.
Zyrtarë të Bashkimit Evropian i kanë thënë Reuters se po e ndjekin nga afër mënyrën se si Rama po i trajton rastet e korrupsionit dhe se lufta kundër krimit dhe korrupsionit është thelbësore për aspiratën e vendit ballkanik për t’u anëtarësuar në BE deri në vitin 2030. /Reuters – Përgatiti në shqip Zoom.al
