Përkthyer nga The Telegraph
Shqiptarët dyshohet se i drejtojnë operacionet e tyre kriminale nga burgu, pasi shifrat zyrtare treguan se ata bënë më shumë se dyfishin e telefonatave nga burgjet sesa çdo kombësi tjetër.
Të dhënat e Ministrisë së Drejtësisë në Britani (MD) kanë zbuluar se të burgosurit shqiptarë kanë bërë 157,962 telefonata nga burgu në gjashtë muajt e fundit, ekuivalente me gati 900 në ditë.
Shqiptarët janë kombësia e huaj më e madhe për nga numri në burgjet në Angli dhe Uells, me më shumë se 1.200 të burgosur, të ndjekur nga polakët dhe rumunët.
Shqiptarët, polakët dhe rumunët janë tre kombësitë më të mëdha për të burgosurit e huaj në burgjet në Angli dhe Uells, duke përfaqësuar një të katërtën e të gjithë shkelësve të huaj në burgje.
Sipas të dhënave të shërbimit të burgjeve, numri i thirrjeve të bëra nga shkelësit shqiptarë ishte katër herë më i lartë se numri i bërë nga polakët dhe rumunët, përkatësisht, kombësitë e dyta dhe të treta më të mëdha në burg. Polakët, të cilët përbëjnë 740 të burgosur, bënë 209 thirrje në ditë (gjithsej 37,691), ndërsa rumunët, me 708 të burgosur, bënë 207 thirrje në ditë (gjithsej 37,307).
Numri i dytë më i lartë i përgjithshëm ishte 73,541 thirrje nga 678 të burgosur nga Irlanda, e ndjekur nga 57,867 thirrje nga 68 amerikanë.
‘Jashtëzakonisht joproporcionale’
Prof Ian Acheson, një ish-guvernator burgu dhe ish-këshilltar i Qeverisë për ekstremizmin në burg, tha se numri i telefonatave nga të burgosurit shqiptarë dukej “jashtëzakonisht disproporcional”.
“Ajo që dimë është se krimi i organizuar shqiptar dominon shpërndarjen e drogës brenda burgut. Se sa shumë kanë ndikim jashtë burgut është më pak e qartë, por nuk do të ishte për t’u habitur nëse ata janë vazhdimisht në telefonat e tyre duke organizuar marrëveshje”, tha ai.
Kjo vjen pasi David Lammy, ish-sekretari i drejtësisë, paralajmëroi se bosët e bandave po i drejtonin gjithnjë e më shumë perandoritë e tyre kriminale nga burgu.
Ai shtoi se krimi i organizuar “koordinohej gjithnjë e më shumë” nga udhëheqësit e bandave brenda burgjeve.
Z. Lammy deklaroi se kriminelët po përdorin gjithashtu “dronë gjithnjë e më të sofistikuar” për të transportuar drogë dhe armë direkt në burgje, duke shmangur masat tradicionale të sigurisë.
Kriminelët shqiptarë burgosen kryesisht për vepra penale të lidhura me drogën ose vjedhjen. Ata janë specializuar në kultivimin e kanabisit, gjë që i ka mundësuar atyre të zëvendësojnë vietnamezët si furnizuesit kryesorë vendas të drogës në Britani, sipas Agjencisë Kombëtare Kundër Krimit (NCA).
Bandat shqiptare që më parë specializoheshin në kokainë u futën në kanabis sepse ishte “shumë, shumë i ulët në rrezik”.
Kanabisi sjell një fitim të konsiderueshëm për shkak të kërkesës së lartë – britanikët konsumojnë 240 ton drogë, me vlerë 2.4 miliardë paund, në vit – dhe nuk kërkon transport të rrezikshëm ndërkufitar sepse rritet në vend, sipas NCA-së.
Rritja e numrit të shqiptarëve që kaluan Kanalin në vitin 2022, kur 12,685 arritën në Mbretërinë e Bashkuar me varka të vogla, ka siguruar një furnizim të gatshëm me punëtorë të paligjshëm, të aftë në teknologjinë hidroponike të nevojshme për të rritur bimët në dhomat e errëta të shtëpive në të cilat të gjitha dritaret janë mbyllur.
‘Jo të gjitha kombësitë paraqesin rrezik të barabartë krimi’
Shifrat nga telefonatat u nxorën nga Nick Timothy, sekretari i drejtësisë në hije, i cili ka kërkuar publikimin e plotë të të dhënave të krimit për shtetasit e huaj.
Gazeta “The Telegraph” zbuloi të dielën se Ministria e Drejtësisë po ndërmerrte veprime ligjore për të bllokuar publikimin e shkallës së krimit të shtetasve të huaj në Angli dhe Uells.
Z. Timothy tha: “Burgjet tona janë tashmë plot dhe 10,000 të burgosur janë shtetas të huaj që nuk duhet të jenë këtu. Duhet të pranojmë se jo të gjitha kombësitë paraqesin një rrezik të barabartë krimi, siç dëshmohet nga këto të dhëna.
“Vetëm shqiptarët janë përgjegjës për më shumë thirrje ndërkombëtare për në burg sesa SHBA-të, Kanadaja, Japonia, Italia, Gjermania dhe Franca së bashku. Afganët, irakianët dhe pakistanezët gjithashtu përbëjnë një numër disproporcional.”
“Partia Laburiste duhet të publikojë statistikat e krimit sipas kombësisë, në mënyrë që të ketë transparencë të plotë se kush kryen krime në vendin tonë.”
10 vendet kryesore për thirrje telefonike ishin Shqipëria (157,962), Irlanda (73,541), SHBA-të (57,867), Polonia (37,691), Rumania (37,307), Franca (33,844), India (32,581), Spanja (30,668), Italia (28,110) dhe Gjermania (27,278).
Thirrjet lejohen nga telefonat e burgut, por numrat duhet të jenë të miratuar paraprakisht. Thirrjet mund të monitorohen aty ku zyrtarët e burgut besojnë se mund të ketë rrezik për sjellje kriminale.
ARRSH hap tenderin 5.24 milionë euro për lidhjen e Unazës Verilindore me Rrugën e Arbërit
