Në Tiranë vijon procesi i numërimit të votave preferenciale të kandidatëve, ku deri tani janë numëruar 311 nga 1282 kuti votimi, sipas të dhënave zyrtare nga Komisioni Qendror i Zgjedhjeve (KQZ).
Partia Socialiste ka siguruar deri tani 19 mandate, nga të cilat 12 i takojnë listës së mbyllur dhe 7 kandidatëve më të votuar nga lista e hapur.
Në krye të votave preferenciale është Blendi Gonxhja, i ndjekur nga ministri i Brendshëm, Ervin Hoxhaj, dhe ish-ministri Fatmir Xhafaj. Në mesin e shtatë më të votuarve ndodhen gjithashtu Erion Braçe, Antonela Dedej dhe Anila Denaj.
Emra të njohur jashtë listës fituese: Deri tani mbeten jashtë Pandeli Majko, Mimi Kodheli, Olta Xhaçka dhe Etilda Gjonaj.
PD ka siguruar 13 mandate në kryeqytet, ku vetëm një prej tyre vjen nga lista e hapur. Kandidati më i votuar aktualisht është Ilir Alimehmeti, i cili ka një epërsi prej rreth 70 votash ndaj Jorida Tabakut, duke e lënë këtë të fundit jashtë Kuvendit në këtë fazë të numërimit.
Ilir Meta (FRD), Shpëtim Idrizi (PDIU), Myslym Murrizi dhe Asllan Dogjani nuk kanë arritur të sigurojnë mjaftueshëm vota për të hyrë në Kuvend, sipas të dhënave paraprake.
Mundësia: Do të përfaqësohet nga Agron Shehaj dhe Erald Kapri.
Nisma “Shqipëria Bëhet”: Do të ketë në Kuvend Adriatik Lapajn, i cili ka lënë pas Endri Shabanin në vota preferenciale.
Lëvizja BASHKË: Jashtë mbetet Arlind Qori, ndërsa i pari në listë dhe me më shumë vota është Redi Muçi.
PSD: Do të përfaqësohet nga Albana Pëllumbi, e para në listën e mbyllur./ Zoom.al
