Pas urdhërit të Kryeministrit Edi Rama për një “vetëpastrim” në administratat vendore, në Bashkinë e Bulqizës janë larguar nga detyra 8 administratorë të njësive administrative, përfshirë edhe qytetin. Përveç tyre, dorëheqjen kanë dhënë edhe dy nënkryetarë dhe të gjithë drejtorët e drejtorive bashkiake. Ky veprim është pjesë e një lëvizjeje tradicionale pas urdhrave të qeverisë për pastrim institucional.
Në Bashkinë e Klosit, megjithatë, 4 administratorët dhe nënkryetari nuk kanë dhënë ende dorëheqje, pasi procesi është ende në zhvillim e sipër. Situata po ndjek po të njëjtin skenar edhe në Bashkinë e Dibrës, ku hedhjet e dorëheqjeve vijojnë.
Ndërkohë, Bashkia Mat është përfshirë nga tërmeti i lëvizjeve: 8 administratorë këtë herë i dhanë dorëheqjen, së bashku me një nënkryetar, pasi njeriu i dytë në krye u zgjodh të pasojë kreun e bashkisë Agron Malaj, i cili dha dorëheqje për t’u fokusuar në fushatën zgjedhore pas kandidimit për deputet në 11 maj. Megjithatë, deri në shtator, nuk do të ketë largime për drejtorët, për shkak të zgjedhjeve të parakohshme vendore që pritet të mbahen në fund të vitit .
Edhe në Gramsh, pas dorëheqjes së 9 administratorëve dje, sot të gjithë drejtuesit e drejtorive dhe përgjegjësit e tyre kanë ndjekur të njëjtin rrugëtim, duke dhënë dorëheqjen e plotë.
Sa i përket nënkryetarëve në bashki të ndryshme, njëra prej tyre është emëruar vetëm para një muaji, ndërsa tjetri është në prag pensioni, gjë që po ndikon në ngadalësimin e tranzicionit institucional.
