Pasi Donald Trump “shkundi” botën duke tarifuar shumë vende për eksportet e tyre drejt SHBA-së, Drejtori i Këshillit Ekonomik Kombëtar të SHBA-së, Kevin Hassett, bëri të ditur se mbi 50 vende kanë kontaktuar Shtëpinë e Bardhë për të nisur negociata tregtare.
Ai mohoi që tarifat e vendosura nga Presidenti Trump të jenë një mënyrë për të ndikuar Rezervën Federale për uljen e normave të interesit.
Ndërkohë, Presidenti Trump deklaroi se ekonomia amerikane po përjeton një “revolucion ekonomik”, me mbi pesë trilionë dollarë investime dhe rritje të punësimit. Ai theksoi se tarifat po rikthejnë vendet e punës dhe bizneset në SHBA, duke shtuar se “Amerika do të bëhet e madhe sërish”.
Mes atyre që janë gati për negociata për tatifat është edhe Bashkimi Evropian.
Presidentja e Komisionit Evropian, Ursula von der Leyen shprehu shqetësim për tarifat amerikane, duke i cilësuar si të dëmshme për ekonominë globale, veçanërisht për vendet më të varfra.
Ajo konfirmoi gatishmërinë e BE-së për negociata, por gjithashtu theksoi se Unioni është i përgatitur të mbrojë interesat e veta nëse është e nevojshme./ Zoom.al
