Kryeministri Edi Rama ka vijuar edhe sot sulmet dhe ironitë ndaj blogerëve dhe influencereve që kanë dalë kundër projektit të investimit në Zvërnec.
Gjatë një aktiviteti në Shkodër, në kuadër të 35-vjetorit të Partisë Socialiste, Rama u ndal gjatë te figurat publike që kanë mbështetur protestat, duke u marrë jo vetëm me qëndrimet e tyre, por edhe me mënyrën si paraqiten në rrjetet sociale dhe vishen në plazh.
Kreu i qeverisë ironizoi një influencere që sipas tij publikonte foto nga Parisi dhe më pas kërkonte që bregdeti shqiptar të mbetej i paprekur, pasi dëshironte të dilte aty me bikini.
Rama shkoi deri aty sa përmendi edhe “lidhsen e vogël” të bikinit, duke shtuar me ironi se protestuesit që e mbështesin thonë: “Inshallah i këputet lidhsja”.
Ai nuk ndaloi me kaq, por ironizoi edhe një tjetër influencere, duke thënë se ajo shfaqej në protesta ndërsa promovonte produkte kozmetike, duke lënë të kuptohej se pjesëmarrja e saj kishte më shumë lidhje me marketingun sesa me mbrojtjen e mjedisit.
Në fjalën e tij, Rama akuzoi kundërshtarët e projektit se po përpiqen të largojnë investitorët e huaj nga Shqipëria dhe se duan ta kthejnë vendin në një “rezervat për blogerë dhe influencerë”, ndërsa mbrojti projektet turistike që po zhvillohen në vend.
“Ne kemi zgjidhur këtë me Paketën e Maleve, këta thonë do u’a marrin tokat oligarkët. Këta thonë që të gjithë emigrantët që duan të investojnë në pronat e stërgjyshërve, por që nuk e kanë njohur 7501-shin, duhet ta harrojnë ta bëjnë këtë gjë, sepse nuk ka për ta asnjë zgjidhje tjetër sepse duhet të futen te 7501-shi.
Po ka kohë Shqipëria të humbasë me këto pallavra? Malin e Zi e keni një vend ku keni hyrë e keni dalë që nga viti 1991. Shikojeni Malin e Zi si ka qenë në 1991 dhe si është sot? Pse nuk na kanë lënë të jemi si Mali i Zi?
Sepse duan të nxjerrin të huajt jashtë. Sepse duan ta bëjnë Shqipërinë rezervat për blogera e influencera. Se më thonë pse bëre ashtu dje. Më tregonte një nga ata punonjësit e rinj, ishte njëra te kulla Eifel, kishte bërë një foto kështu dhe dukej 3 herë më e gjatë se unë. Kur e pash thashë do më bjerë sipër. Dhe thoshte ‘u hap koha në Paris’.
Natyrisht, se kur ti ke mundësi të shkosh në Paris e Dubai, hallall të qoftë. Por t’i s’ke pse u thua shqiptarëve ‘atje e dua komplet të virgjër bregun e detit, sepse atje do dal me bikini, me atë lidhsen e vogël’. Edhe këta që i shkojnë nga pas në protestë thonë ‘Inshallah i këputet lidhsja’.
Kjo tjetra nxirrte kremra, që t’i kur të futeshe atje të bëje solidaritet për zogjtë, të shitej edhe ndonjë krem fytyre. Fytyre m’u duk mua, se kushedi ça fërkohej me të”, tha mes të tjerash Rama
Deputetja Jorida Tabaku i bashkohet protestës te Kryeministria
