Policia e Lezhës ka dhënë detajet e para lidhur me plagosjen e regjistruar pasditen e kësaj të enjteje, ku një 30-vjeçar mbeti i lënduar pas një sulmi me mjet prerës.
I plagosuri është identifikuar si Renato Leka, i cili, sipas autoriteteve, ka marrë një plagë në dorë dhe është transportuar në Spitalin Rajonal të Lezhës për të marrë ndihmë mjekësore.
Blutë bëjnë me dije se 30-vjeçari ndodhet nën kujdesin e mjekëve dhe fatmirësisht është jashtë rrezikut për jetën.
Sipas njoftimit zyrtar, rreth orës 16:20 policia u informua se në spital ishte paraqitur një shtetas me inicialet R. L., i plagosur me thikë. Pas marrjes së informacionit, në vendngjarje dhe në spital janë kryer veprimet e para procedurale.
Ndërkohë, është ngritur një grup i posaçëm hetimor, i cili po punon për të zbardhur plotësisht rrethanat e ngjarjes, si dhe për identifikimin dhe kapjen e autorit./ Zoom.al
