Mediat greke i kanë ushtuar vëmendje protestës në Zvërnec dhe ka raportuar për pjesëmarrjen e qytetarëve nga Greqia dhe përplasjen mes protestuesve dhe rojeve private të sigurisë.
Gazeta greke “Kathimerini” shkruan se në protestën e zhvilluar të shtunën morën pjesë qindra persona, ndërsa një pjesë e tyre kishin udhëtuar nga Greqia për t’iu bashkuar tubimit.
Sipas raportimit, dy autobusë janë nisur nga Athina mbrëmjen e së premtes, ndërsa qytetarë të tjerë kanë mbërritur me automjetet e tyre private nga zona të ndryshme të Greqisë.
“Kathimerini” përmend një takim të zhvilluar disa ditë para protestës mes përfaqësuesve të komunitetit të Zvërnecit në Athinë, përfaqësuesve të bashkisë së Vlorës dhe avokatëve të lidhur me investitorët. Sipas pjesëmarrësve, qëllimi i takimit ishte shmangia e tensioneve dhe ulja e reagimeve për protestën e paralajmëruar.
Një prej protestuesve, Alexandros Poulas, deklaroi për “Kathimerini” se organizatorët kishin kërkuar vetëm një protestë simbolike brenda zonës së rrethuar me gardh dhe më pas largimin pa incidente.
Megjithatë, sipas dëshmive të banorëve, pas gardhit ndodheshin persona të veshur me të zeza, të cilët dyshohej se ishin pjesë e një kompanie private sigurie. Protestuesit pretendojnë se ata mbanin shkopinj gome, filmonin pjesëmarrësit dhe ushtronin presion ndaj tyre.
Protesta kulmoi me dhunimin e një protestuesi me shtetësi shqiptare dhe greke, ngjarje që ka sjellë reagime si në Shqipëri ashtu edhe në Greqi. Ndërkohë, autoritetet shqiptare kanë nisur hetimet për zbardhjen e plotë të ngjarjes dhe identifikimin e përgjegjësive lidhur me dhunën e ushtruar gjatë protestës.
Pjesë nga shkrimi:
Takimi me përfaqësuesit e shoqatës Svernica në Athinë ishte planifikuar rreth një javë më parë me iniciativën e palës shqiptare për të “zgjidhur keqkuptimin” rreth investimit të planifikuar prej 4 miliardë dollarësh në turizëm në veri të fshatit të tyre. Përpjekja për të kontaktuar u bë pasi telat me gjemba ishin vendosur në vijën bregdetare shqiptare. Të shtunën, një grumbullim i banorëve në atë pikë rezultoi në incidente serioze me rrahjen e një protestuesi.
Gardhi bllokonte aksesin në plazhe dhe fusha që dikur kultivoheshin nga vendasit, tokë mbi të cilën pronësia ka qenë subjekt i vitesh betejash ligjore. Për komunitetin vendas, gardhi ishte një “shfaqje force” nga interesat e biznesit. Ata kishin pritshmëri të ulëta për takimin e planifikuar në Athinë.
Të mërkurën e kaluar, vonë pasdite, rreth dhjetë emigrantë nga Zvërneci pritën në Ilion të Atikës kryetaren e bashkisë Vlorë, një asistente të saj dhe dy avokatë nga ana e investitorëve. Diskutimi zgjati rreth dy orë, sipas banorëve.
Ishte e ditur që ata po planifikonin të protestonin të shtunën, më 30 maj, përpara gardhit, dhe pala tjetër donte të zbuste reagimet e saj. ” Qëllimi i tyre ishte të parandalonin demonstratën. Na thanë se donin të na mbronin, në mënyrë që të mos kishte trazira”, i thotë gazetës Alexandros Poulas, i cili mori pjesë në atë takim.
Më shumë se 300 njerëz u mblodhën në demonstratën e së shtunës së kaluar. Dy autobusë ishin nisur nga Athina të premten në mbrëmje, ndërsa disa pjesëmarrës ishin nisur nga qytete të tjera në Greqi me makinat e tyre. “Kur iu afruam gardhit, i lamë protestuesit dhjetë metra pas dhe së bashku me kryetarin e fshatit, Kosta Konomi, folëm me kreun e policisë”, thotë Poulas.
Siç e përshkruan ai, ata kërkuan të kalonin gardhin, të demonstronin për rreth 15 minuta brenda zonës së bllokuar dhe pastaj të largoheshin . Do të ishte një veprim simbolik. “Ne nuk do të hynim brenda për të shkatërruar. Asgjë nuk është ndërtuar ende në zonë, nuk kishte makineri atje”, thekson ai.
Megjithatë, pas gardhit, ishin mbledhur burra të veshur me të zeza, pa uniforma dalluese, të cilët dukeshin si anëtarë të një ekipi privat sigurie. Sipas dëshmive të banorëve, disa prej tyre po i kërcënonin, po i filmonin me celularë dhe mbanin shkopinj gome. “Ata ishin aty vetëm për të frikësuar”, thotë z. Poulas.
