Kuvendi i Shqipërisë ka miratuar sot me 79 vota pro rezolutën e paraqitur nga grupi parlamentar i Partisë Socialiste, e cila shpall Iranin si shtet terrorist. Rezoluta u kalua pas fjalës së kreut të grupit parlamentar të PS-së, Taulant Balla, i cili gjatë prezantimit ftoi deputetët për votim.

Në seancë pati vetëm një abstenim, nga deputeti i Lëvizjes Bashkë, Redi Muçi, ndërsa deputeti i opozitës, Erald Kapri, ishte gjithashtu prezent. 58 deputetë të opozitës, kryesisht të Partisë Demokratike, nuk morën pjesë në seancë, duke e konsideruar këtë mbledhje si axhendë personale të kryeministrit Edi Rama dhe një fasadë parlamentare.

Kreu i Grupit Parlamentar të PD-së, Gazment Bardhi, kritikoi mënyrën e thirrjes së seancës jashtë ditës normale të zhvillimit të saj, duke theksuar se rendi i ditës përfshinte vetëm miratimin e procesverbalit dhe njoftime, pa një rend dite të shpallur zyrtarisht, në shkelje të procedurave të Rregullores së Kuvendit.

Nga ana e tij, Taulant Balla shprehu keqardhje për mungesën e deputetëve të opozitës, duke vlerësuar se ata duhet të mbështesnin qëndrimin kundër Iranit dhe të qëndronin në krah të Shqipërisë dhe aleatëve si SHBA, Franca dhe Gjermania. Ai kritikoi bojkotin e opozitës si një veprim të motivuar nga interesa të vogla politike.

Dokumenti i plotë:

“PROJEKT  R E Z O L U T Ë

Për shpalljen e Republikës Islamike të Iranit si Shtet Sponsor i Terrorizmit dhe Shtet që përdor mjete terroriste.

Kuvendi i Shqipërisë,

Duke qenë se Republika e Shqipërisë është fuqimisht e përkushtuar ndaj parimeve të Kartës së Kombeve të Bashkuara, të drejtës ndërkombëtare dhe mbrojtjes së paqes dhe sigurisë ndërkombëtare;

Duke qenë se terrorizmi në të gjitha format dhe shfaqjet e tij përbën një nga kërcënimet më serioze ndaj paqes ndërkombëtare, sigurisë dhe shoqërive demokratike;

Duke qenë se raporte të besueshme dhe vlerësime ndërkombëtare kanë dokumentuar në mënyrë të përsëritur përfshirjen e autoriteteve të Republikës Islamike të Iranit në financimin, trajnimin, armatosjen dhe drejtimin e grupeve dhe organizatave të armatosura jo-shtetërore të shpallura si entitete terroriste në disa rajone;

Duke qenë se Republika Islamike e Iranit, përmes institucioneve të saj shtetërore, përfshirë Gardën Revolucionare Islamike (IRGC) dhe strukturat e lidhura me të, ka mbështetur dhe koordinuar aktivitete që destabilizojnë vende në Lindjen e Mesme dhe më gjerë;

Duke qenë se Republika e Shqipërisë ka qenë vetë objekt i veprimeve armiqësore në hapësirën kibernetike, përfshirë sulmin e rëndë kibernetik ndaj institucioneve shtetërore shqiptare në vitin 2022, i atribuar strukturave të lidhura me Republikën Islamike të Iranit, si dhe përpjekjet e ditëve të fundit për sulme kibernetike ndaj sistemeve të Kuvendit të Shqipërisë;

Duke qenë se aktet e dhunës dhe të agresionit, përfshirë sulmet kibernetike kundër institucioneve shtetërore, infrastrukturës kritike dhe shteteve sovrane përbëjnë shkelje të së drejtës ndërkombëtare dhe mund të përbëjnë forma të terrorizmit;

Duke qenë se përdorimi sistematik i frikësimit, i grupeve të armatosura proxy, si dhe i mjeteve hibride për të përhapur frikë dhe destabilizim është i papajtueshëm me normat e marrëdhënieve paqësore ndërkombëtare;

Duke qenë se Republika e Shqipërisë, si anëtare e NATO-s dhe vend kandidat për anëtarësim në Bashkimin Evropian, ka në themel të politikës së saj të jashtme dhe të sigurisë parimet e solidaritetit demokratik, shtetit të së drejtës dhe mbrojtjes së paqes dhe stabilitetit ndërkombëtar;

Duke qenë se populli dhe institucionet shqiptare mbeten të përkushtuara në luftën kundër terrorizmit në të gjitha format e tij dhe në mbajtjen përgjegjës të atyre që sponsorizojnë ose kryejnë akte terrori;

Kuvendi i Shqipërisë:

1. Dënon me termat më të ashpër veprimet e Qeverisë së Republikës Islamike të Iranit që mbështesin, mundësojnë ose kryejnë akte terrorizmi, operacione hibride dhe aktivitete destabilizuese në rajone të ndryshme të botës si dhe shpreh solidaritetin e plotë me vendet mike të Gjirit Persik dhe me Turqinë, të cilat janë shënjestuar nga aktiviteti terrorist i sponsorizuar nga Qeveria e Republikës Islamike të Iranit.
2. Dënon gjithashtu sulmet kibernetike të kryera kundër institucioneve të Republikës së Shqipërisë, përfshirë sulmin e vitit 2022 ndaj infrastrukturës shtetërore dhe përpjekjet e fundit për ndërhyrje në sistemet e Kuvendit të Shqipërisë.
3. Shpall Republikën Islamike të Iranit si Shtet Sponsor të Terrorizmit dhe si shtet që përdor mjete terroriste në ndjekje të objektivave të tij të politikës së jashtme.
4. Dënon aktivitetet e Gardës Revolucionare Islamike (IRGC) dhe entiteteve të lidhura me të për rolin e tyre në mbështetjen e organizatave terroriste, forcave të armatosura përfaqësuese dhe operacioneve destabilizuese.
5. I bën thirrje Qeverisë së Republikës së Shqipërisë që :

– të forcojë masat kombëtare dhe ndërkombëtare për të luftuar terrorizmin e sponsorizuar nga shtetet dhe kërcënimet kibernetike;

– të bashkëpunojë ngushtë me vendet aleate dhe partnere në parandalimin dhe luftimin e financimit të terrorizmit dhe aktiviteteve të lidhura me strukturat shtetërore iraniane;

– të mbështesë nismat në organizatat ndërkombëtare që synojnë përgjegjshmërinë për aktet e terrorizmit, sulmet kibernetike dhe shkeljet e së drejtës ndërkombëtare.

– të shpallë menjëherë Gardën Revolucionare Islamike (IRGC), si organizatë terroriste,

– të shpallë gjithashtu Hezbollah si një organizatë terroriste proxy të Republikës Islamike të Iranit, duke iu bashkuar Shteteve të Bashkuara të Amerikës, Gjermanisë, Hollandës dhe një numri shtetesh anëtare të BE-së si dhe vende të tjera, të cilat e kanë ndërmarrë më parë këtë përcaktim.

6. U bën thirrje vendeve demokratike, organizatave ndërkombëtare dhe partnerëve të Shqipërisë që të shqyrtojnë masa të koordinuara kundër terrorizmit të sponsorizuar nga shtetet dhe të forcojnë bashkëpunimin ndërkombëtar në luftën kundër këtyre kërcënimeve.
7. Rikonfirmon përkushtimin e palëkundur të Shqipërisë ndaj paqes ndërkombëtare, vlerave demokratike dhe mbrojtjes së civilëve nga aktet e terrorit.
8. Udhëzon që kjo Rezolutë t’i përcillet Qeverisë së Republikës së Shqipërisë, qeverive aleate, Organizatës së Kombeve të Bashkuara, Bashkimit Evropian dhe partnerëve të tjerë ndërkombëtarë përkatës”.

Postime të lidhura

• 
  "Do zoti ka të tjera"/ Ja sa kushton ora që "shkriu" Taulant Ballën (Foto)
• 
  Gjermania i del kundër Trump/ Merz: Nuk na pyetën kur e nisën luftës
• 
  Gjermania lehtëson eksportet e armëve për Gjirin Persik
• 
  Irani kërcënon edhe Rumaninë: Do të keni pasoja nëse...
• 
  Lideri i ri iranian dërgohet në Moskë pas plagosjes në sulmin ajror
• 
  Mojtaba Khamenei mbahet në jetë me aparatura, si është gjendja e liderit të Iranit
• 
  Shqipëria shpall Iranin sponsor të terrorizmit, Izraeli përshëndet vendimin
• 
  Trump bën bilancet: SHBA ka goditur mbi 7 mijë objektiva ushtarake në Iran
• 
  Trump i zhgënjyer: SHBA do shqyrtojë anëtarësimin në NATO
• 
  “Garda Revolucionare dhe Hezbollahu, terroristë”, Rama: Javës tjetër, rezolutë për Iranin
• 
  “Është homoseksual?”, çfarë zbuloi CIA për Mojtaba Khamenei?