Bashkëthemeluesi i Microsoft, Bill Gates, ka dëshmuar para një komisioni të Kongresit amerikan, ku ka pranuar se gjatë martesës së tij ka pasur disa marrëdhënie jashtëmartesore.
Sipas dokumenteve të bëra publike, Gates ka pranuar se ka pasur marrëdhënie me tre gra, të cilat sipas raportimeve kishin pasur gjithashtu kontakte me Jeffrey Epstein. Mes tyre përmenden lojtarja e bridge-it Mila Antonova, fizikania Karima Nigmatulina dhe mjekja e sipërmarrësja Alice Jacobs Nesselrodt.
Miliarderi amerikan deklaroi se marrëdhënia me Nesselrodt kishte nisur vite më parë, ndërsa lidhjet e tjera u zhvilluan më vonë. Ai tha se kishte folur me ish-bashkëshorten e tij, Melinda French Gates, për këto marrëdhënie gjatë martesës së tyre.
I pyetur nëse këto episode mund të kenë ndikuar në divorcin e vitit 2021, Gates pranoi se ato mund të kenë luajtur një rol në vendimin për t’i dhënë fund martesës së tyre shumëvjeçare.
Në dëshminë e tij, Gates deklaroi gjithashtu se Jeffrey Epstein kishte dijeni për disa nga këto marrëdhënie dhe se kishte lënë të kuptohej se mund të përdorte këtë informacion për ta vënë nën presion. Megjithatë, ai theksoi se nuk ishte shantazhuar asnjëherë.
Biznesmeni amerikan pranoi se kishte pasur edhe marrëdhënie të tjera jashtëmartesore, por mohoi çdo lidhje të tyre me Epstein. Ai hodhi poshtë gjithashtu pretendimet që lidhen me disa dokumente të publikuara nga autoritetet amerikane, duke i cilësuar ato të pavërteta.
Gates deklaroi se gjatë takimeve me Epstein mund të ketë qenë në të njëjtin ambient me disa prej viktimave të financierit, por mohoi çdo përfshirje në veprimtari të paligjshme apo sjellje të papërshtatshme.
Marrëdhënia e tij me Epstein ka qenë objekt debatesh prej vitesh. Në vitin 2021, Melinda French Gates deklaroi se kontaktet e bashkëshortit të saj me financierin e dënuar kishin qenë një nga faktorët që ndikuan në divorcin e tyre.
Ndërkohë, mediat amerikane kanë raportuar edhe më parë për marrëdhënie të mundshme të Gates me punonjëse të Microsoft dhe të Fondacionit Gates. Në vitin 2019, kompania hapi një hetim të brendshëm pas një ankese të bërë nga një ish-punonjëse, ndërsa një vit më vonë Gates u largua nga bordi drejtues i Microsoft.
Sipas raportimeve të mediave amerikane, një nga episodet më të diskutuara lidhet me Mila Antonovën, e cila më vonë krijoi kontakte edhe me Jeffrey Epstein. Kjo situatë ka nxitur dyshime se financieri mund të ketë tentuar të ushtronte ndikim ndaj Gates.
Polici në Itali humbi jetën gjatë ndjekjes së shqiptarit, flet 26-vjeçari: Kisha drogë me vete
