Emërimi i Rolando Maran në krye të Kombëtares Shqiptare të Futbollit nuk përfaqëson vetëm një ndërrim trajneri, por edhe një ndryshim i qartë në filozofinë sportive që po ndjek Federata Shqiptare e Futbollit pas mbylljes së ciklit të Sylvinho.
Pas një periudhe të karakterizuar nga energjia braziliane, stili ofensiv dhe eksperimenti modern me Sylvinhon, federata ka zgjedhur të rikthehet te modeli tradicional italian, duke ia besuar pankinën një trajneri me eksperiencë të gjatë në futbollin italian dhe me profil më pragmatist.
Karriera e Sylvinhos dhe ajo e Rolando Maran janë ndërtuar mbi baza krejt të kundërta.
Sylvinho mbërriti në Shqipëri si një emër i njohur i futbollit botëror për shkak të së kaluarës si lojtar te klube elitare si Arsenal, Barcelona dhe Manchester City. Megjithatë, si trajner ai kishte një eksperiencë relativisht të kufizuar. Para Shqipërisë kishte drejtuar vetëm Lyon dhe Corinthians, pa arritur rezultate të qëndrueshme apo trofe madhorë.
Në kontrast të plotë, Rolando Maran nuk ka pasur kurrë famën e një ish-ylli të futbollit europian, por ka ndërtuar një karrierë të gjatë e të qëndrueshme si trajner në Itali. Ai ka drejtuar skuadra si Catania, Chievo Verona, Cagliari, Genoa dhe Brescia, duke kaluar mbi dy dekada në pankinat e Serie A dhe Serie B.
Në aspektin e eksperiencës së pastër si trajner, Maran duket dukshëm më i konsoliduar. Ai ka menaxhuar qindra ndeshje në kampionatin italian dhe ka ndërtuar reputacion si specialist për organizimin defensiv dhe stabilitetin e skuadrave.
Kur Sylvinho mori drejtimin e Shqipërisë, kishte skepticizëm për mungesën e përvojës së tij. Por braziliani arriti të krijonte një atmosferë të re brenda Kombëtares.
Ai solli një staf ndërkombëtar me figura të njohura si Pablo Zabaleta dhe Doriva, ndërsa ndryshoi mënyrën e lojës së Shqipërisë duke kërkuar më shumë presion, intensitet dhe kontroll të topit.
Rezultatet folën në favor të tij. Shqipëria arriti një tjetër kualifikim historik në Kampionatin Europian dhe riktheu entuziazmin te tifozët kuqezi. Për shumë analistë, Sylvinho modernizoi imazhin e Kombëtares dhe i dha ekipit një identitet më agresiv.
Megjithatë, projekti i tij kishte edhe një kosto të lartë financiare. Paketa e stafit teknik shkonte afro 1 milion euro në vit, një nga investimet më të mëdha që ka bërë ndonjëherë FSHF-ja.
Me Rolando Maran, Shqipëria pritet të ndryshojë sërish identitetin në fushë. Italiani njihet për disiplinën taktike, organizimin defensiv dhe futbollin racional, karakteristika tipike të shkollës italiane.
Ndryshe nga Sylvinho, i cili vinte nga ambienti i klubeve elitare europiane si lojtar, Maran është produkt i futbollit të përditshëm italian, aty ku mbijetesa, balanca taktike dhe menaxhimi i presionit kanë rëndësi maksimale.
Eksperienca e tij me skuadra si Chievo dhe Cagliari tregon se ai di të ndërtojë ekipe kompakte dhe konkurruese edhe me buxhete të kufizuara. Pikërisht kjo duket të jetë arsyeja pse FSHF vendosi të rikthehet te një profil më ekonomik dhe më tradicional.
Me largimin e Sylvinhos, Shqipëria mund të humbasë një pjesë të energjisë dhe frymës moderne që braziliani solli në ekip. Ai kishte aftësinë të motivonte grupin dhe të krijonte lidhje të fortë me tifozët.
Nga ana tjetër, ardhja e Maran mund t’i japë Kombëtares më shumë stabilitet afatgjatë dhe eksperiencë taktike në menaxhimin e ndeshjeve të vështira./ Zoom.al
ARRSH hap tenderin 5.24 milionë euro për lidhjen e Unazës Verilindore me Rrugën e Arbërit
