Pas vrasjes së udhëheqësit suprem të Iranit, Ali Khamenei, vëmendja është përqendruar te pasardhësi i mundshëm në krye të Republikës Islamike, në një moment kur vendi po përballet me luftë, pasiguri dhe tensione të forta të brendshme.
Sipas Reuters, një nga emrat që po përmendet gjithnjë e më shpesh është Hassan Khomeini, nipi i themeluesit të Republikës Islamike, Ruhollah Khomeini.
Hassan Khomeini, rreth 50 vjeç, është figura më e njohur ndër 15 nipërit dhe mbesat e Ajatollahut Khomeini. Ai mban gradën klerikale Hojatoleslam dhe konsiderohet relativisht i moderuar brenda establishmentit fetar iranian.
Ai ka lidhje të afërta me kampin reformist dhe ka bashkëpunuar politikisht me ish-presidentët Mohammad Khatami dhe Hassan Rouhani, të cilët gjatë mandateve të tyre kanë promovuar dialogun dhe angazhimin me Perëndimin.
Në qarqe politike dhe akademike, Hassan Khomeini shihet si një alternativë ndaj krahut konservator të ashpër, i cili ka konsoliduar pushtetin vitet e fundit dhe që lidhej ngushtë me rrethin e Ali Khameneit.
Megjithëse i deklaruar besnik ndaj sistemit të Republikës Islamike të krijuar pas Revolucionit të vitit 1979, ai ka shprehur herë pas here qëndrime kritike ndaj institucioneve të pushtetit.
Në vitin 2021, Hassan Khomeini kritikoi vendimin e Këshilli i Gardianëve për të skualifikuar kandidatët reformistë nga zgjedhjet presidenciale, një vendim që çoi në zgjedhjen e Ebrahim Raisi, i cili humbi jetën në një aksident me helikopter në vitin 2024.
Ai gjithashtu kërkoi transparencë dhe përgjegjësi pas vdekjes së Mahsa Amini në vitin 2022, ngjarje që shkaktoi protesta masive në mbarë Iranin. Megjithatë, gjatë këtyre trazirave, ai kritikoi edhe protestuesit që sulmonin drejtpërdrejt udhëheqjen, duke riafirmuar mbështetjen e tij për rendin shtetëror.
Rreth një dekadë më parë, Hassan Khomeini tentoi të kandidonte për Asambleja e Ekspertëve, institucioni që zgjedh Udhëheqësin Suprem. Ai u skualifikua nga Këshilli i Gardianëve, zyrtarisht për shkak të gradës së tij klerikale, por vendimi u interpretua gjerësisht si një bllokim politik ndaj reformistëve./ Zoom.al
ARRSH hap tenderin 5.24 milionë euro për lidhjen e Unazës Verilindore me Rrugën e Arbërit
