Agjencia Kombëtare e Shoqërisë së Informacionit ka përzgjedhur bashkimin e kompanive “Kreatx” dhe “HardTech” si fitues të tenderit për “përmirësimin e platformës së shërbimit konsullor online”, me një vlerë prej rreth 1.95 milionë euro pa TVSH, pavarësisht se oferta e tyre ishte më e larta mes tre operatorëve pjesëmarrës.
Në dokumentet zyrtare rezulton se aksioner në kompaninë “Kreatx” është z. Panajot Gjiknuri, vëllai ish-ministrit Damian Gjiknuri.
Sipas dokumenteve, në garë morën pjesë pesë kompani, nga të cilat vetëm tre dorëzuan ofertat e tyre.
Ndër to, bashkimi i kompanive “Advanced Business Solutions – ABS” e Gerond Meçes, përfituesi kryesor i tenderëve të AKSHI-t dhe “DataLog”, në pronësi të Sokol Sinanit, po ashtu i përfolur për afera me tenderët e AKSHI-t dhe lidhje e ngushtë ish-ministrit të arrestuar Ilir Beqaj, kishte ofruar çmimin më të ulët, rreth 1.6 milionë euro, por u skualifikua për shkaqe teknike, lidhur me mungesën e autorizimit për platformën “Oracle”, mbi të cilën operon sistemi.
