Një konflikt për pronësinë e një shtëpie luksoze dyshohet se qëndron pas vrasjes së 41-vjeçarit Altin Arapaj nga Vlora, i cili u gjet i pajetë në një vresht në zonën e Rafinas, Greqi.
Gruaja e viktimës, në një intervistë për televizionin grek “STAR”, ka rrëfyer versionin e saj, duke pretenduar se shkak i krimit ishte një mosmarrëveshje për një shtëpi në pronësi të një amerikani, e dhënë me qira prej vitesh një shtetasi kanadez.
Sipas saj, burri i saj ishte kërcënuar prej kohësh që të largohej nga prona.
“E kishte paralajmëruar, i thoshte: ‘Largohu, se kjo shtëpi është e imja, do ta marr unë. Je në mes të askundit’,” tregon ajo.
Autori i dyshuar, Mikel Selimaj, 46 vjeç, gjithashtu nga Vlora, ishte një njohje e vjetër e viktimës. Së bashku me dy persona të tjerë, ai do të dalë sot përpara gjykatës greke. Burime të policisë greke pohojnë se të dy janë përfshirë më parë në veprimtari problematike në moshë të re.
Ngjarja dyshohet se ndodhi pak pas një vendimi gjyqësor që e detyronte palën që pretendonte shtëpinë të paguante kompensim.
“Kur humbën gjyqin, kanadezi i tha burrit tim: ‘Merr këto para dhe hiqe nga dora ime’. Në fund, e pagoi shtëpinë me jetën e burrit tim”, u shpreh gruaja me lot në sy.
Avokati i autorit, Nikos Roussopoulos, ka deklaruar për mediat se klienti i tij ndodhej nën efektin e kokainës në momentin e ngjarjes dhe se akti ishte rezultat i një “shpërthimi të papritur mendor”.
Ndërkohë, policia ka sekuestruar automjetin e autorit dhe ka bërë kontroll në banesën ku ai qëndronte me qira./ Zoom.al
