Një ish-kampion i Interit të fillimit të viteve 2000, sot trajner i një skuadre të rëndësishme të Europës Lindore, kur zbret në Milano, duket se përfiton nga një shërbim i mirëorganizuar “all-inclusive” i ofruar nga agjencia Ma.De. Milano. Mbrëmja nis në një klub nate modern, mes shisheve të shtrenjta shampanje dhe vajzave të imazhit që shoqërojnë klientët VIP, për të vijuar më pas në një hotel në shoqërinë e një eskorte të re.
Por në qendër të hetimit të Prokurorisë së Milanos nuk është vetëm luksi i natës. Sipas dosjes hetimore, rreth shtatëdhjetë futbollistë – kryesisht nga Serie A – dyshohet se kanë qenë klientë të rregullt të një rrjeti që ofronte jo vetëm evente ekskluzive në klube nate, por edhe shërbime eskortash, me pagesa që shkonin në mijëra euro për mbrëmje.
Hetimi, i cili ka çuar në arrest shtëpie për katër persona, përfshirë drejtuesit e agjencisë Deborah Ronchi dhe Emanuele Buttini, flet për një organizatë të strukturuar që vepronte në Milano dhe gjatë verës zhvendosej në Mykonos. Në qendër të saj dyshohet se ishte një sistem i qëndrueshëm rekrutimi vajzash të reja, italiane dhe të huaja, të moshës 19 deri në 22 vjeç.
Sipas hetuesve, aktiviteti zhvillohej në disa klube nate dhe ambiente të lidhura me agjencinë, ku vajzat merrnin një përqindje nga shpenzimet e klientëve, ndërsa futbollistët shpenzonin deri në 3,000 euro në një natë të vetme.
Prokuroria e Milanos thekson se pjesë e xhiros së përgjithshme prej mbi 1.2 milion eurosh në dy vite, rreth 200,000 euro vinin nga transfertat bankare të kryera nga futbollistë të klubeve si Milan, Inter, Juventus, Torino, Sassuolo, Monza dhe Verona. Në dokumente përmenden gjithashtu edhe sportistë të disiplinave të tjera, si dhe një pilot i Formula 1.
Hetimi përshkruan gjithashtu një ambient ku, sipas dëshmive, në disa mbrëmje përdorej edhe oksid azoti (“laughing gas”), një substancë psikoaktive që nuk zbulohet në testet antidoping, si dhe substanca të tjera si hashashi.
Një element që ka tërhequr vëmendje të veçantë të hetuesve është mënyra e pagesave, shpesh të vonuara, që më pas ndiqeshin përmes mesazheve dhe llogarive bankare. Në disa biseda të përgjuara, administratorët e rrjetit diskutojnë hapur për “klientët futbollistë” dhe shumën që duhet të rikuperohet.
Në dokumente përmendet edhe një episod i raportuar nga një nga vajzat, e cila ka deklaruar se i është dashur të bëjë një test shtatzënie pas një takimi me një nga klientët, një futbollist 26-vjeçar i një ekipi të Serie A.
Hetimi vijon, ndërsa prokuroria po analizon rolin e secilit prej të përfshirëve në atë që përshkruhet si një sistem i mirëorganizuar midis jetës së natës, eventeve luksoze dhe shërbimeve eskortë në Milano dhe jashtë saj./corriere.it
