Neda Balluku dhe Ogren Balluku janë rikthyer në qendër të vëmendjes së medias rozë pas publikimit të lajmit për divorcin e tyre, duke i dhënë fund një martese që ka zgjatur 10 vite.
Çështja është depozituar tashmë në sekretarinë e gjykatës me numër 17084, ndërsa shorti elektronik ka caktuar gjyqtaren Majlinda Dogga për shqyrtimin e kërkesë-padisë. Sipas Vip Magazine, çifti është paraqitur një marrëveshje e përbashkët divorci, në të cilën palët kanë rënë dakord për ndarjen e detyrimeve dhe pasojave që rrjedhin nga zgjidhja e martesës.
Lajmin e ka konfirmuar vetë Neda Balluku gjatë një interviste në emisionin “Goca dhe Gra”, ku u shpreh se marrëdhënia e tyre kishte kaluar një periudhë të vështirë, duke pranuar se kriza ka qenë e pranishme prej kohësh.
Neda dhe Ogreni u njohën në vitin 2010 gjatë pjesëmarrjes në spektaklin “Big Brother Albania”, ku nisën edhe lidhjen e tyre të komentuar gjerësisht. Çifti u martua në vitin 2015, duke u konsideruar një nga historitë më të mira të dashurisë që dolën nga formati.
