Një mjek nga Kalifornia, i cili i furnizoi ketaminë yllit të serialit “Friends”, Matthew Perry, është dënuar me 30 muaj burg.
Salvador Plasencia ishte një nga pesë të akuzuarit në një hetim shumëvjeçar që shqyrtoi se si Perry e siguroi anestezionin disociues përmes një rrjeti droge në Hollywood.
54 vjeçari u gjet i vdekur në shtëpinë e tij në Los Angeles në vitin 2023, pas vitesh luftimesh me depresionin dhe varësinë.
Familja e aktorit i kërkoi gjykatësit një dënim të gjatë, duke e quajtur Plasencia “më fajtorin” dhe duke detajuar vështirësitë e tyre për të kuptuar pse ai e furnizonte vazhdimisht Perry-n me drogë.
Nëna e 54 vjeçarit, Suzanne Morrison, ishte midis disa anëtarëve të familjes që folën në gjykatë përpara dënimit të Plasencia.
Ajo zbuloi mesazhet ku mjeku e kishte quajtur Perry-n një “idiot” dhe pyeste veten se sa do të ishte i gatshëm të paguante për drogën.
“Nuk kishte asgjë idiote tek ai”, tha nëna e Perry, duke shtuar se mjeku kishte bërë një betim për të mbrojtur njerëzit dhe se duhej ta kishte mbrojtur djalin e saj.
Plasencia foli gjithashtu në gjykatë dhe iu drejtua familjes së Perry, duke shprehur keqardhje, ndërsa nëna e tij qante. Plasencia tha se ka një djalë dy vjeç: “Dua ta rris siç duhet. Nuk ka justifikim. Nuk mund ta zhbëj atë që është bërë. E di këtë. Duhet ta kisha mbrojtur, siç tha nëna e tij. Më vjen shumë keq.”
FOTO LAJM/ Qese me mbetje te kordoni policor, mesazhi simbolik: Mos i mbroni plehrat
