Pas Botërorit nis një kapitull i ri për heronjtë e Kepit të Gjelbër. Eliminimi nga Argjentina i dha fund ëndrrës së “Peshkaqenëve Blu”, por jo historisë së tyre. Botërori 2026 i vendosi në qendër të vëmendjes dhe tani secili prej protagonistëve përgatitet për sfidën e radhës.
Në krye të listës është portieri Vozinha. Kontrata e tij me Chaves në Portugali ka përfunduar dhe pas paraqitjeve mbresëlënëse në Botëror pritet të gjejë një ekip të ri. Vetë ai ka bërë të ditur se është i hapur për çdo mundësi, madje edhe për një transferim në Brazil.
Edhe mbrojtja ka liderin e saj, Pico Lopes. 34-vjeçari mbetet lideri i Shamrock Rovers në Irlandë. Megjithatë, mediat lokale flasin për një largim të mundshëm drejt Shteteve të Bashkuara, një hap që mund të vijë pas aventurës së paharrueshme në Botëror.
Edhe në mesfushë, Deroy Duarte ka rritur ndjeshëm vlerat e tij. Autori i golit të barazimit ndaj Argjentinës është nën kontratë me Ludogorets në Bullgari deri në vitin 2028, por paraqitjet në Kupën e Botës pritet të sjellin oferta të reja. Jo e njëjta qetësi shoqëron kapitenin Ryan Mendes, i cili ka përfunduar kontratën me Igdir në Turqi. E ardhmja e tij mbetet e paqartë, ndërsa në Zelandën e Re vijon një hetim ndaj tij.
Në fund, vëmendja përqendrohet te zbulimi më i madh i turneut, Sidny Lopes Cabral. Goli spektakolar ndaj Argjentinës e bëri një nga emrat më të komentuar të Botërorit. I transferuar te Trabzonspor për 10 milionë euro pak para nisjes së turneut, ai pritet të vazhdojë karrierën në Turqi, tashmë me statusin e një prej talenteve më premtues të futbollit afrikan.
Botërori ka përfunduar, por për Kepin e Gjelbër kjo duket vetëm pika e nisjes. Skuadra është kthyer në shtëpi me një eliminim, por edhe me bindjen se futbolli i këtij vendi ka fituar një vend të ri në hartën e botës.
