Pas gati një muaji në arrati, policia greke ka vënë në pranga 27-vjeçarin shqiptar Ylli Shkalla, i cili ishte arratisur më 18 shtator nga burgu i Kasandrës në Halkidiki.
Arrestimi i tij u bë në një parking përgjatë autostradës PATHE, në drejtim të Selanikut, ku efektivët e policisë e gjetën brenda një automjeti të vjedhur.
Sipas mediave greke, gjatë kontrollit, oficerët zbuluan një pistoletë imitim dhe një telefon celular, të cilat u sekuestruan menjëherë.
Hetimet treguan se makina që përdorte Shkalla ishte vjedhur më 12 tetor, ndërsa pronari kishte bërë kallëzim në polici një ditë më pas. Automjeti tashmë i është kthyer pronarit ligjor, ndërsa hetimet për mënyrën e vjedhjes po vijojnë.
Ylli Shkalla ishte dënuar në Greqi me 7 vite e 6 muaj burg për lehtësim të kalimit të emigrantëve, ndërsa më parë ishte arrestuar në Tiranë në vitin 2017 për nëntë raste vjedhjesh në bashkëpunim./ Zoom.al
