Ish-këshilltari për sigurinë kombëtare i kryeministrit sllovak Robert Fico, Miroslav Lajçak, ka reaguar publikisht pas daljes në dritë të mesazheve të tij me Jeffrey Epstein, duke pranuar se ndihet i turpëruar nga mënyra si është shprehur në ato biseda private.
Në një intervistë për median sllovake, ai tha se rileximi i komunikimeve e ka bërë të reflektojë për sjelljen e tij, të cilën e cilësoi si mungesë gjykimi. Sipas tij, shkëmbimet ishin biseda personale që nuk do të donte t’i shihte të publikuara, por megjithatë pranoi përgjegjësinë për tonin e përdorur.
Dokumentet e publikuara së fundmi nga autoritetet amerikane përfshijnë komunikime ku Epstein bënte komente për jetën personale dhe përmendte takime të Lajçakut me figura ndërkombëtare, përfshirë ministrin e jashtëm rus Sergei Lavrov. Në to përmendet edhe një ide për një takim mes Robert Ficos dhe Steve Bannon, takim që sipas Lajçakut nuk u zhvillua kurrë.
Ai mohoi të ketë kryer shkelje ligjore, por vendosi të largohet nga detyra për të shmangur pasoja politike për qeverinë. Lajçak tha se nuk mund të konfirmojë me siguri autenticitetin e plotë të mesazheve, pasi nuk i kujtohen të gjitha detajet e komunikimit.
Duke folur për marrëdhënien me Epstein, ai e përshkroi atë si një person me lidhje të gjera në qarqe të larta, të cilin e konsideronte një kontakt me ndikim. Megjithatë, theksoi se kjo nuk e përjashton nga përgjegjësia morale për mënyrën e komunikimit.
Lajçak konfirmoi gjithashtu se kishte qenë në një apartament të Epstein, por deklaroi se aty ndodheshin edhe figura të tjera nga politika dhe biznesi. Ai shtoi se nuk kishte dijeni për aktivitetet kriminale të Epstein dhe se komunikimi mes tyre kishte mbetur në nivel bisedash, pa përfshirje në veprime të tjera.
“Kur i lexova ato mesazhe sot, ndihem si budalla. Ishte një bisedë private, të jemi të sinqertë, kush do të ishte i lumtur nëse i gjithë kombi do t’i lexonte mesazhet e tyre? Të paktën, unë ushtrova gjykim të dobët”, tha për Radio Slovakia të hënën në mbrëmje Miroslav Lajčák, i cili shërbeu si ministër i jashtëm sllovak në disa qeveri të Ficos midis viteve 2009 dhe 2020./ Zoom.al
