Filantropistja miliardere Melinda French Gates ka rrëfyer për ndarjen nga ish-bashkëshorti i saj, bashkëthemeluesi i Microsoft, Bill Gates, duke folur për “momente të dhimbshme në martesën e saj”.
Në një podcast të NPR komentoi edhe faktin që Bill Gates përmendet në dosje të reja që lidhen me pedofilin e ndjerë Jeffrey Epstein
Ajo deklaroi se ndjen “trishtim të pabesueshëm” për akuzat ndaj Epstein dhe se njerëzit e përmendur në të dhëna, përfshirë ish-bashkëshortin e saj, duhet të përgjigjen për këtë.
“Jam shumë e lumtur që jam larg gjithë kësaj rrëmuje”, tha ajo. Çifti u divorcua në vitin 2021 pas 27 vitesh martesë.
Të dhënat e publikuara nga departamenti i drejtësisë i SHBA-së përfshijnë një pretendim nga Epstein se Bill Gates u infektua me një sëmundje seksualisht të transmetueshme. Ai e ka quajtur pretendimin “absolutisht absurd”.
Në intervistën me podcastin Wild Card, Melinda French Gates tha: “Për mua, është personalisht e vështirë sa herë që dalin këto detaje, apo jo? Sepse më sjellin kujtime të disa kohërave shumë, shumë të dhimbshme në martesën time.”
Ajo shtoi: “Çfarëdo pyetjesh, unë as nuk mund t’i di të gjitha, ato pyetje janë për ata njerëz dhe madje edhe për ish-burrin tim. Ata duhet t’u përgjigjen këtyre gjërave, jo unë.”
Media amerikane ka raportuar se para ndarjes së tyre, Melinda French Gates ishte e mërzitur për kontaktet e burrit të saj me Epstein. Pasi u njoftua ndarja e tyre, Bill Gates pranoi se kishte pasur një aferë me një punonjëse të Microsoft në vitin 2019.
