Andrea Pirlo nuk do të jetë trajneri i ekipit kombëtar. Njoftimi zyrtar erdhi nga vetë ai në një postim në Instagram ku shkruan se “Mbrëmë mësova se nuk jam më kandidat për ekipin kombëtar italian”.
Trajneri aktual i United FC Dubai publikoi deklaratën të hënën, duke sqaruar edhe polemikat e ditëve të fundit që lidhen me bashkëpunimin e tij me kompaninë Fonbet.
Në reagimin e tij, Pirlo theksoi se gjatë gjithë karrierës si futbollist dhe trajner ka respektuar gjithmonë ligjet e vendeve ku ka punuar dhe kontratat që ka nënshkruar.
“Në ditët e fundit, kam qenë dëshmitar me hidhërim të madh i debatit që është zhvilluar rreth emrit tim dhe mundësisë së mbajtjes së rolit të trajnerit të ekipit kombëtar italian. Nga respekti për institucionet, Federatën dhe të gjithë ata që janë të përfshirë, kam zgjedhur të hesht deri më tani. Megjithatë, e ndiej detyrën time të sqaroj disa aspekte. Gjatë gjithë karrierës sime, së pari si futbollist dhe tani si trajner, gjithmonë i kam zhvilluar aktivitetet e mia në përputhje të plotë me ligjet e vendeve në të cilat kam punuar dhe kontratat që kam nënshkruar.
Bashkëpunimi profesional në qendër të polemikave të fundit lindi në kontekstin e karrierës sime në Emiratet e Bashkuara Arabe dhe është ekskluzivisht i një natyre tregtare dhe sportive . T’i atribuosh rëndësi politike këtij bashkëpunimi do të thotë të më atribuosh bindje që nuk i kam shprehur kurrë dhe që nuk më përkasin mua.”
Në fund të deklaratës, ish-kampioni i botës falënderoi Paolo Maldinin dhe Leonardon për mbështetjen dhe besimin e treguar ndaj tij, ndërsa la të kuptohej se shpresat për të marrë drejtimin e kombëtares kishin marrë fund.
“Dua të falënderoj Maldinin dhe Leonardon për respektin dhe besimin që më kanë treguar. E njoh ekspertizën e tyre, seriozitetin e tyre dhe dashurinë që i kanë kushtuar gjithmonë futbollit italian. Më vjen keq që një vendim sportiv u. zvarrit shpejt në një debat publik që përfundoi duke më atribuar kuptime dhe qëllime që nuk janë të miat . Dashuria ime për Italinë nuk varet nga një pozicion. Është pjesë e historisë sime, identitetit tim dhe do të vazhdojë të jetë me mua, gjithmonë.”
