Një ngjarje e dhunshme është regjistruar mesditën e sotme në qytetin e Lezhës, ku Nikolin Marku është sulmuar brutalisht brenda një lokali. Sipas deklarimeve të tij, pas ngjarjes qëndron Gëzim Ndoka, vëllai i ish-deputetit të Partisë Socialiste, Arben Ndoka.
Marku pohon se në ambientin e lokalit janë futur pesë persona të maskuar, të cilët kanë nisur menjëherë dhunën fizike ndaj tij. Ai shprehet se njëri prej autorëve është identifikuar si nipi i ish-deputetit, djali i Gëzim Ndokës, ndërsa sulmi ka qenë i mirëorganizuar.
Nga përplasja fizike ka mbetur i lënduar edhe kushëriri i Markut, i cili ndodhej në të njëjtin ambient në momentin e ngjarjes. Të dy janë detyruar të marrin ndihmë mjekësore për shkak të dëmtimeve të pësuara.
Situata, sipas Markut, nuk ka përfunduar me kaq. Ai deklaron se gjatë kohës që ndodhej në spital për trajtim mjekësor, Gëzim Ndoka është paraqitur aty dhe e ka kërcënuar drejtpërdrejt, duke e përkeqësuar edhe më tej situatën.
Policia ka nisur hetimet për zbardhjen e plotë të rrethanave të ngjarjes, ndërsa pritet të sqarohen rolet dhe përgjegjësitë e personave të përfshirë në këtë konflikt të dhunshëm./ Zoom.al
