Situata e sigurisë në Lindjen e Mesme është tensionuar ndjeshëm pas një vale raketash të lëshuara nga Irani në drejtim të Izraelit, në atë që cilësohet si reagim ndaj veprimeve të fundit ushtarake të Shteteve të Bashkuara dhe Izraelit.
Sulmi i koordinuar SHBA-Izrael ndodhi pranë zyrave të Khameneit, sipas mediave të huaja.
Pas sulmeve, udhëheqësi Suprem Ajatollah Ali Khamenei nuk është në Teheran, tha një zyrtar iranian për Reuters dhe është zhvendosur në një vend të sigurt.
Ndërkohë, Forcat e Mbrojtjes së Izraelit konfirmuan se kërcënimi nga raketat e Iranit u identifikua në kohë reale dhe se sistemet e mbrojtjes ajrore u vunë menjëherë në funksion për të neutralizuar raketat hyrëse. Si pasojë, alarmet e emergjencës u aktivizuan në disa rajone të vendit.
Autoritetet izraelite u bënë thirrje qytetarëve të ndjekin udhëzimet e Komandës së Frontit të Brendshëm, duke qëndruar në strehime dhe duke shmangur lëvizjet e panevojshme, pasi mbrojtja ajrore nuk garanton mbulim të plotë në çdo rast.
Ndërkohë, Forcat Ajrore të Izraelit janë angazhuar në operacione për interceptimin e raketave dhe monitorimin e hapësirës ajrore, ndërsa situata mbetet dinamike dhe në zhvillim.
Ngjarja vjen pas deklaratave të forta nga presidenti i Shteteve të Bashkuara, Donald Trump, i cili konfirmoi se SHBA po zhvillon operacione të gjera ushtarake kundër Iranit në koordinim me Izraelin. Sipas tij, qëllimi kryesor është eliminimi i rreziqeve të menjëhershme ndaj interesave amerikane dhe aleatëve në rajon./ Zoom.al
