Këngëtari Labinot Rexha ka vijuar me reagimet e tij publike ndaj produksionit të Big Brother VIP Kosova 4, duke publikuar materiale të reja që, sipas tij, zbulojnë prapaskena të formatit.
Një ditë pasi shpërndau një video ku pretendonte se banorët Bia Khalifa dhe Labinot Haxhiu kishin gjetur telefonin e Albës brenda shtëpisë – veprim që do të përbënte shkelje të rëndë të rregullores – Rexha ka publikuar të tjera incizime që kanë nxitur debat në rrjetet sociale.
Në videot e fundit, dëgjohen biseda që pretendohet se janë regjistruar në dhomën e rrëfimit. Në to përmendet emri i producentes Olsa Muhameti, e cila sipas interpretimit të materialit të publikuar, shfaqet duke komunikuar me dy banorë dhe duke tentuar që situata të mos marrë përmasa publike.
Në disa pjesë të incizimeve aludohet për oferta apo favore të mundshme, si informacione nga jashtë apo garanci për qëndrim më të gjatë në lojë – pretendime që, nëse provohen, do të përbënin shkelje serioze të rregullave të formatit.
Publikimet kanë sjellë reagime të shumta online: një pjesë e ndjekësve kërkojnë sqarim zyrtar nga produksioni, ndërsa të tjerë shprehen skeptikë dhe kërkojnë verifikim të autenticitetit të videove.
Deri në këto momente, nuk ka një reagim të detajuar nga produksioni lidhur me përmbajtjen e publikuar, ndërsa çështja vijon të jetë ndër temat më të diskutuara rreth spektaklit./ Zoom.al
