Të fshehura mes më shumë se tre milionë dokumenteve të publikuara nga Departamenti Amerikan i Drejtësisë të premten e kaluar, ndodhen kontrata dhe regjistra pagesash që identifikojnë dy klientë miliarderë të papublikuar më parë të Jeffrey Epstein: manjatin e pasurive të paluajtshme Mortimer Zuckerman dhe Ariane de Rothschild, trashëgimtare e familjes Rothschild përmes martese.
Sipas dokumenteve, Epstein u ka ofruar Zuckermanit dhe de Rothschild-it shërbime për planifikimin e pasurisë dhe ndoshta edhe shërbime të tjera financiare. Së bashku, ata rezulton se i kanë paguar atij 45 milionë dollarë, një shumë jashtëzakonisht e lartë për llojin e punës që Epstein pretendonte se kryente, sipas dy ekspertëve të planifikimit të pasurisë që folën për Forbes në mënyrë anonime, për shkak të ndjeshmërisë së çështjes.
“Rregullat etike të [industrisë] kërkojnë që tarifat të jenë të arsyeshme,” tha njëri prej tyre. “Këto tarifa janë të çmendura.”
Ekziston gjithashtu fakti se Epstein nuk ishte as avokat dhe as kontabilist, ndaj i mungonin kualifikimet e zakonshme për të ofruar shërbime të tilla.
Klientët duket se e kanë paguar Epstein-in mes viteve 2013 dhe 2015, pra disa vite pasi ai ishte deklaruar fajtor në vitin 2008 në një gjykatë shtetërore në Florida për dy akuza penale që lidhen me prostitucionin. Zuckerman, de Rothschild dhe ish-diplomati norvegjez Terje Rød-Larsen, i cili shfaqet si palë e tretë në njërën prej kontratave, nuk iu përgjigjën kërkesave për koment.
Këto zbulime hedhin dritë mbi disa nga misteret që lidhen me origjinën e pasurisë së Jeffrey Epstein-it. Forbes ka raportuar më herët se krimineli seksual, pasuria e të cilit vlerësohej në rreth 600 milionë dollarë në momentin e vdekjes, e ndërtoi këtë pasuri kryesisht gjatë dy dekadave të fundit të jetës përmes kompanive të tij me bazë në Ishujt e Virgjër Amerikanë, Financial Trust dhe Southern Trust. Nga viti 1999 deri në 2018, këto dy entitete gjeneruan mbi 800 milionë dollarë të ardhura: më shumë se 360 milionë dollarë në dividentë dhe 488 milionë dollarë në tarifa nga klientë ultratë pasur, gjoja për ofrimin e shërbimeve financiare.
Një pjesë e madhe e këtyre tarifave është gjurmuar tashmë. Les Wexner, themelues i L Brands dhe ish-pronar i Victoria’s Secret (pasuri neto: 8.9 miliardë dollarë), vlerësohet se i ka paguar Epstein-it mbi 200 milionë dollarë — pjesa më e madhe. Bashkëthemeluesi i Apollo Global Management, Leon Black (13.6 miliardë dollarë), i pagoi Epstein-it 170 milionë dollarë; ndërsa fondi spekulativ i Glenn Dubin (2.9 miliardë dollarë) transferoi edhe 15 milionë dollarë të tjerë. Kjo linte rreth 103 milionë dollarë nga klientë të panjohur.
Pagesat e zbuluara në publikimin e ri të Departamentit të Drejtësisë (DOJ) shpjegojnë një pjesë të konsiderueshme të këtij misteri prej 103 milionë dollarësh. Shuma më e madhe e zbuluar në dokumentet e reja vjen nga viti 2015 dhe lidhet me Ariane de Rothschild, familjen e saj dhe bankën e tyre të investimeve, Edmond de Rothschild. Në atë kohë e martuar me miliarderin Benjamin de Rothschild (vdekur në 2021), Ariane ishte anëtare e bordit të bankës; ajo u bë CEO në vitin 2023, dy vjet pas vdekjes së bashkëshortit.
Epstein dhe Ariane de Rothschild duket se kishin një marrëdhënie miqësore, duke shkëmbyer disa email-e dhe duke u takuar në Nju Jork dhe Paris mes viteve 2014 dhe 2019. Në një seri mesazhesh të vitit 2013 mes Epstein-it dhe një anëtari të komitetit ekzekutiv të Grupit Edmond de Rothschild, ky i fundit e pyeti Epstein-in: “Çfarë i bëre Arianes…?”, të cilës Epstein iu përgjigj: “E dëgjova.” Personi më pas shkroi: “I pëlqeu shumë. Dhe ti preke gjëra që kanë rëndësi për të.” (Një artikull i Wall Street Journal në vitin 2023 raportoi se Epstein dhe de Rothschild kishin negociuar një kontratë të propozuar mes Southern Trust dhe bankës. Një zëdhënës i bankës i tha gazetës se ajo nuk ishte në dijeni të krimeve të Epstein-it dhe se “ajo ndjen dhembshuri dhe mbështet viktimat.”)
Një kontratë, e datës 5 tetor 2015, përshkruan një pagesë prej 10 milionë dollarësh për Epstein-in nga Edmond de Rothschild (Suisse) për “një sërë çështjesh strategjike biznesi”. Një kontratë tjetër, e datës 3 nëntor 2015, parashikon që Southern Trust e Epstein-it të vazhdojë bashkëpunimin me de Rothschild për planifikimin e pasurisë familjare, “si edhe” për “çështjet strategjike të biznesit”, ndërsa ajo do t’i paguante Southern Trust 15 milionë dollarë.
Këto shuma së bashku përputhen me 25 milionë dollarët në tarifa që Epstein mori përfundimisht nga bashkëshorti i de Rothschild-it dhe kompania e tyre, sipas dy faturave dhe një liste transaksionesh me llogaritë e Epstein-it në Deutsche Bank.
“Një tarifë prej 15 milionë dollarësh do të ishte e barabartë me tarifat e tre prej avokatëve më të shtrenjtë për truste dhe planifikim pasurie në të gjithë vendin.”
Këto “çështje strategjike biznesi” mund të kenë përfshirë ndihmën e Epstein-it për bankën Rothschild në arritjen e një marrëveshjeje me Departamentin e Drejtësisë së SHBA-së, pasi disa klientë amerikanë të bankave të saj kishin fshehur pasuri në Zvicër. Ndërsa kontrata përfundimtare e nënshkruar nuk e përmend këtë marrëveshje, një draft i mëhershëm nga shtatori 2015 e lidhte kompensimin e Epstein-it me rezultatin e saj. Ai parashikonte se Epstein do të paguhej 10 milionë dollarë nëse DOJ vendoste një gjobë mbi 75 milionë dollarë, por nën 150 milionë, ose 25 milionë dollarë nëse palët do të arrinin një marrëveshje për më pak se 75 milionë dollarë.
Edmond de Rothschild (Suisse) arriti përfundimisht një marrëveshje mosndjekjeje penale me DOJ-në në kuadër të “Programit Zviceran të Bankave”, për të zgjidhur “përgjegjësi të mundshme penale” në SHBA, për shumën 45.2 milionë dollarë më 18 dhjetor 2015 — çka do t’i garantonte Epstein-it një pagesë prej 25 milionë dollarësh. Dy pagesat që në total arrinin 25 milionë dollarë u transferuan te Southern Trust më 17 dhe 21 dhjetor, rreth të njëjtës kohë kur u njoftua marrëveshja me DOJ-në. Megjithatë, mbetet e paqartë nëse të dyja shumat ishin të destinuara për punën e Epstein-it mbi marrëveshjen qeveritare, apo nëse 15 milionë dollarë ishin për planifikimin e pasurisë, siç sugjerojnë kontratat e mëvonshme.
Ndërkohë, marrëdhënia e Mortimer Zuckerman-it me kriminelin seksual daton të paktën që nga viti 2003, kur ai nënshkroi librin e 50-vjetorit të Epstein-it me urimin “kohë të bukura, urime më të mira dhe paqe”. Një vit më pas, ata bashkëpunuan për lançimin e revistës së kulturës pop Radar, e cila pati jetë të shkurtër (Zuckerman është një investitor i njohur në media, ish-pronar i The Atlantic dhe Fast Company, dhe ende zotëron U.S. & World News Report).
Dokumentet e publikuara të premten përfshijnë drafte të një kontrate për planifikim pasurie mes Zuckerman-it dhe Southern Trust të Epstein-it nga viti 2013. Versionet e hershme të atij viti tregojnë se Epstein kërkonte 30 milionë dollarë; në fund, ai duket se u dakordësua për 20 milionë dollarë për veten dhe 1 milion dollarë për një palë të tretë, ish-diplomatin norvegjez Terje Rød-Larsen.
Nuk është e qartë pse Rød-Larsen u përfshi në kontratë; ai përshkruhet si i pa “lidhur në asnjë çështje” me Epstein-in. Dihet se diplomati kishte marrë hua para nga Epstein-i dhe se fëmijët e tij janë renditur ndër përfituesit e testamentit të kriminelit seksual. Bashkëshortja e Rød-Larsen-it, Mona Juul, gjithashtu diplomate, i tha transmetuesit norvegjez NRK në janar se ajo dhe bashkëshorti i saj nuk kishin qenë në dijeni të testamentit derisa ai u raportua në media. (Rød-Larsen kishte deklaruar më herët, në vitin 2020, se ishte një “gjykim seriozisht i gabuar” nga ana e tij të hynte në një marrëdhënie financiare me Epstein-in.)
Mbetet gjithashtu e paqartë nëse Zuckerman-i i pagoi përfundimisht Epstein-it tarifën prej 20 milionë dollarësh, pasi në dokumente nuk shfaqen fatura. Megjithëse kontrata e tij daton në vitin 2013, është e mundur që ai të ketë qenë klient i Epstein-it edhe më herët, sipas email-eve të papublikuara më parë nga një arkiv i rrjedhur, i ndarë me Forbes nga organizata jofitimprurëse Distributed Denial of Secrets. Në ato dokumente nuk shfaqen pagesa apo kontrata me Zuckerman-in dhe ato nuk janë bërë publike nga DOJ apo Komiteti i Mbikëqyrjes së Dhomës së Përfaqësuesve. Megjithatë, ato tregojnë se asistenti i Epstein-it i dërgoi atij planin e pasurisë së Zuckerman-it në dhjetor 2007. Dy muaj më vonë, asistenti i miliarderit të pasurive të paluajtshme i dërgoi Epstein-it një memorandum mbi detyrimin e tij të parashikuar për taksën e trashëgimisë.
