Një ish-kryeministër britanik dyshohet se ka qenë i përfshirë në një trekëndësh seksual me Ghislaine Maxwell, bashkëpunëtoren e dënuar të Jeffrey Epstein, sipas pretendimeve të bëra nga historiani mbretëror Andrew Lownie në një intervistë për Daily Mail.
Lownie, autor i biografisë së paautorizuar “The Rise and Fall of the House of York”, foli për zbulimet e fundit që lidhen me dosjet e Epstein, të publikuara nga Departamenti i Drejtësisë i SHBA-së. Javën e kaluar, autoritetet amerikane nxorën në dritë mbi 3 milionë dokumente, foto dhe video nga hetimi ndaj financuesit pedofil Jeffrey Epstein.
I njohur si një nga zërat e parë që paralajmëroi për sjelljet problematike dhe rrjetin e lidhjeve të Princit Andrew me Epstein, Lownie deklaroi se princi i diskredituar nuk ishte i vetmi përfaqësues i elitës britanike i përfshirë në marrëdhënie seksuale me Epstein dhe Maxwell.
“Kam dëgjuar shumë biseda rreth tresheve seksuale – përfshirë një trekëndësh mes Ghislaine dhe një kryeministri britanik”, tha Lownie. I pyetur nëse bëhej fjalë për një kryeministër të kohëve të fundit, ai u përgjigj me ironi: “Në fakt një ish-kryeministër, por nuk është Winston Churchill”.
Historiani shtoi se publiku ende nuk i njeh të gjitha aktivitetet e Princit Andrew në lidhje me Epstein, duke pretenduar se figura brenda Pallatit Buckingham dhe qeverisë “e ndihmuan dhe e mbuluan” atë për vite me radhë. “Ne kemi shumë më tepër për Andrew… ai është mbrojtur më shumë se sa e kuptojmë dhe kjo do të ekspozojë edhe emra të tjerë”, tha Lownie.
Ai bëri thirrje për një hetim parlamentar mbi periudhën e Andrew si Përfaqësues i Tregtisë dhe për publikimin e plotë të dosjeve zyrtare: “Kjo do të ndihmonte për të pastruar ‘stallat’ dhe për të rikthyer një pjesë të besimit”.
Princi Andrew ka mohuar vazhdimisht akuzat për sjellje seksuale të pahijshme. Në vitin 2022, ai e zgjidhi një padi civile me Virginia Giuffre pa pranuar fajësi, ndonëse shprehu keqardhje për lidhjen e tij me Epstein.
Në deklarata edhe më të rënda, Lownie pretendoi se Jeffrey Epstein ishte një aset i inteligjencës ruse, i rekrutuar që në vitet 1980 për të drejtuar operacione të tipit “honeytrap”. “Ka materiale të sekuestruara nga FBI që nuk janë bërë kurrë publike… Epstein tregtonte informacion dhe shantazh”, u shpreh ai, duke shtuar se këto skema synonin figura me pushtet në Britani dhe SHBA.
ARRSH hap tenderin 5.24 milionë euro për lidhjen e Unazës Verilindore me Rrugën e Arbërit
