Sipas raportit final të OSBE/ODIHR për zgjedhjet parlamentare të 11 majit në Shqipëri, garës së listave të kandidatëve i mungoi një fushë e barabartë për të gjithë, ndërkohë që u evidentuan përdorim i burimeve shtetërore në fushatë, presion mbi votuesit dhe mungesë e ndarjes së qartë mes shtetit dhe partisë në pushtet.
Deputeti i opozitës Oerd Bylykbashi përmendi këto gjetje, duke e cilësuar kthim pas në të cilin Shqipëria rikthen modelin e partisë-shtet.
“Në 1990 u vendosën tri standarde: ndarja e shtetit nga partia në pushtet; zgjedhje të lira; garues të barabartë. Në 2025, raporti i ODIHR vulos se ato standarde nuk u respektuan,” deklaroi Bylykbashi. Referuar analizës së tij:
• Kufiri ndarës mes shtetit dhe partisë në pushtet u zhduk.
• Fusha e lojës ishte e pabarabartë.
• Partia Socialiste, si forcë në pushtet, përfitoi nga qenia në qeveri për të fituar avantazh në zgjedhje.
• U ushtrua presion mbi votuesit, veçanërisht në administratën publike.
Bylykbashi përmendi gjithashtu se nuk mund të flitet për garë të drejtë e të barabartë kur kundërshtari është vetë shteti. Aq më pak kur partia-shtet është në aleancë zgjedhore me kartelët e kokainës e heroinës,” duke aluduar në akuzat për ndikim kriminal gjatë procesit zgjedhor.
Ai përfundoi se, ndërsa 35 vjet më parë me Dokumentin e Kopenhagenit u vendosën standardet për zgjedhjet demokratike, “tani po shohim rikthimin e modelit të partisë-shtet nën kryesinë e Edi Rama dhe trashëgimtarëve të modelit të dikurshëm të Partisë së Punës”.
Raporti i ODIHR shënon se procesi në tërësi ishte profesionist dhe konkurrues, por ndodhi në një ambient të thellë të polarizuar dhe garuesit nuk shijuan fushë loje të barabartë.
Postimi i plotë i Oerd Bylykbashit:
ODIHR vë vulën: Kthim pas 35 vite
1990, sapo ra Komunizmi, OSBE caktoi standartin bazë për zgjedhje të lira dhe të drejta:
– Shteti duhet te ndahet nga partia në pushtet.
– Zgjedhjet duhet të jenë të lira.
– Garuesit duhet të kenë barazi në garë.
2025, OSBE/ODIHR damkos zgjedhjet në Shqipëri:
– U zhduk kufiri ndarës mes shtetit dhe partisë në pushtet.
– Fusha e lojës ishte e pabarabartë.
– Partia Socialiste përfitoi nga qenia në pushtet për të fituar avantazh në zgjedhje.
– U ushtrua presion mbi zgjedhësit.
Pra më 11 maj, sipas ODIHR zgjedhjet nuk ishin as të lira dhe as të drejta. Sepse nuk mund të ketë garë të drejtë e të barabartë kur në zgjedhje kundërshtar është shteti. Aq më pak kur partia shtet është në koalicion zgjedhor me kartelet e kokainës dhe heroinës.
35 vite pas Dokumentit të Kopenhagenit që vuri standartet për zgjedhje demokratike, Edi Rama dhe trashëgimtarët e Partisë së Punës rikthyen partinë shtet. Zoom.al/
U transportua në gjendje të rëndë në spital pas zhytjes, humb jetën turistja 30-vjeçare në Vlorë
