Partia Demokratike Europiane (PDE), me seli në Bruksel, ka reaguar lidhur me protestat që po zhvillohen prej 14 ditësh në Tiranë kundër qeverisë dhe kryeministrit Edi Rama.
Në deklaratën e saj, PDE thekson se protestat përfaqësojnë funksionimin e demokracisë dhe u bën thirrje autoriteteve shqiptare që të dëgjojnë zërin e qytetarëve të mbledhur në sheshe.
Sipas kësaj force politike europiane, mobilizimi qytetar lidhet me shqetësimet për mbrojtjen e tokave të mbrojtura, transparencën dhe llogaridhënien publike në raport me marrëveshjet për zhvillime luksoze. “Ky nuk është ‘anti-progres’, por demokracia që po kryen funksionin e saj”, thuhet në reagim.
PDE i është drejtuar edhe drejtpërdrejt kryeministrit Edi Rama, duke theksuar se “Evropa nuk ndërtohet duke e trajtuar natyrën si monedhë pazari apo institucionet si pronë private”.
“Natën e kaluar, sheshet e Shqipërisë u mbushën sërish, qytetarët u mobilizuan për të mbrojtur tokat e mbrojtura, transparencën dhe llogaridhënien publike nga marrëveshje të paqarta për zhvillime luksoze. Ky nuk është ‘anti-progres’. Është demokracia që po kryen funksionin e saj. Dhe Edi Rama duhet të dëgjojë me kujdes: Evropa nuk ndërtohet duke e trajtuar natyrën si monedhë pazari apo institucionet si pronë private. Nëse Shqipëria do Evropën, duhet të zgjedhë të drejtat mbi rrugët e shkurtra, qytetarët mbi betonin dhe shtetin e së drejtës mbi pushtetin”, thuhet në deklaratë.
