Protestat e ditëve të fundit kundër projektit turistik në Zvërnec kanë tërhequr vëmendjen e mediave ndërkombëtare, të cilat e kanë paraqitur çështjen si një përplasje mes mbrojtjes së mjedisit, interesave ekonomike dhe një investimi të lidhur me familjen e presidentit amerikan Donald Trump.
Reuters raportoi për marshimin e mijëra qytetarëve në Tiranë kundër projektit të planifikuar në zonën e mbrojtur të Zvërnecit. Sipas raportimit, protestuesit mbanin pankarta me sloganin “Albania is not for sale” dhe kërkonin anulimin e investimit që lidhet me Jared Kushner dhe Ivanka Trump. Reuters thekson se kundërshtarët e projektit argumentojnë se ai rrezikon një nga ekosistemet bregdetare më të paprekura të Mesdheut.
Edhe Fox News i kushtoi vëmendje zhvillimeve në Shqipëri. Në një raportim të publikuar këtë javë, media amerikane thekson se SPAK po shqyrton ndryshimet e statusit të mbrojtjes së zonës Vjosa-Nartë, ku parashikohet ndërtimi i resortit luksoz. Fox News vuri në dukje gjithashtu protestat që po zhvillohen kundër projektit dhe debatet mbi ndikimin e tij në një prej zonave me biodiversitetin më të pasur në Shqipëri.
Euronews raportoi se protestat hynë në ditën e dytë radhazi, ndërsa mijëra qytetarë dolën në rrugët e Tiranës kundër projektit të lidhur me Kushner. Sipas medias paneuropiane, organizatat mjedisore kanë shprehur prej kohësh shqetësime se ndërtimi në peizazhin e mbrojtur Vjosa-Nartë mund të dëmtojë biodiversitetin dhe korridoret e migrimit të shpendëve.
Interesi i mediave ndërkombëtare për Zvërnecin nuk është i ri. Që në vitin 2024, gazeta franceze Le Monde publikoi një analizë të gjerë mbi planet e Jared Kushner në Shqipëri, duke paralajmëruar se projektet turistike në Sazan dhe Zvërnec mund të cenojnë një nga ekosistemet më të rëndësishme natyrore në Evropë. Gazeta e përshkroi deltën e Vjosës si “një nga zonat e fundit natyrore të paprekura të kontinentit” dhe ngriti pikëpyetje mbi ndryshimet ligjore që lejuan ndërtime në zona të mbrojtura.
Po ashtu, Reuters kishte raportuar më herët për miratimin nga qeveria shqiptare të projektit të lidhur me kompaninë e Kushner, duke nënvizuar se investimi përfshin edhe plane zhvillimi në Zvërnec dhe Sazan, por njëkohësisht ka hasur kundërshtime nga organizata mjedisore për shkak të ndikimit të mundshëm në zonat e mbrojtura.
Në tërësi, pasqyrimi ndërkombëtar i protestave është përqendruar në tre çështje kryesore: mbrojtjen e zonës së Vjosa-Nartës, akuzat për favorizim të investitorëve strategjikë dhe lidhjen e projektit me Jared Kushner dhe Ivanka Trump. Për shumë media perëndimore, protesta në Zvërnec po shihet si një test i balancës mes zhvillimit turistik dhe ruajtjes së një prej zonave më të ndjeshme mjedisore të Shqipërisë.
Botërori humbet një legjendë! Messi i jep lamtumirën mes lotësh
