Nga Lufti Dervishi

Kur janë në opozitë, flasin për Shqipërinë.

Kur janë në pushtet, mendojnë se janë Shqipëria.

Kur janë në opozitë, flasin për ligjin.

Kur janë në pushtet, mendojnë se janë vetë ligji.

Kur janë në opozitë, kërkojnë drejtësi të pavarur.

Kur janë në pushtet, kërkojnë drejtësi të përgjegjshme.

Kur janë në opozitë, prokuroria duhet të hetojë pushtetin.

Kur janë në pushtet, drejtësia nuk duhet merret me politike

Kur janë në opozitë, pas çdo skandali kërkohet dorëheqje.

Kur janë në pushtet, përgjegjësia është personale.

Kur janë në opozitë, duan transparencë.

Kur janë në pushtet, kërkojnë durim.

Kur janë në opozitë, thonë ka korrupsion.

Kur janë në pushtet, ka thjesht “perceptim” për korrupsionin.

Kur janë në opozitë, oligarkët kanë kapur shtetin.

Kur janë në pushtet, nuk ka oligarkë, por investitorë strategjikë.

Kur janë në opozitë, koncesionet dhe PPP-të janë vjedhje.

Kur janë në pushtet, janë instrumente zhvillimi.

Kur janë në opozitë, administrata është e politizuar.

Kur janë në pushtet, është profesionale.

Kur janë në opozitë, ekonomia është në kolaps.

Kur janë në pushtet, qytetarët nuk dinë të lexojnë statistikat.

Kur janë në opozitë, çmimet janë në qiell.

Kur janë në pushtet, njerëzit kanë pritshmëri të larta.

Kur janë në opozitë, pensionistët janë viktima të braktisura.

Kur janë në pushtet, janë heronj që durojnë.

Kur janë në opozitë, njerëzit ikin nga vendi prej qeverisë.

Kur janë në pushtet, njerëzit ikin nga vendi prej opozitës.

Kur janë në opozitë, policia është politike.

Kur janë në pushtet, policia është e shtetit.

Kur janë në opozitë, protestuesit janë qytetarë të revoltuar.

Kur janë në pushtet, janë të manipuluar.

Kur janë në opozitë, protesta është demokraci.

Kur janë në pushtet, është destabilizim.

Kur janë në opozitë, populli duhet dëgjuar në çdo sekondë.

Kur janë në pushtet, populli ka folur me votë

Kur janë në opozitë, zgjedhjet vidhen e manipulohen.

Kur janë në pushtet, humbësi thjesht nuk di të humbasë.

Kur janë në opozitë, ndërkombëtarët duhet të flasin e të ndërhyjnë.

Kur janë në pushtet, nuk duhet të ndërhyjnë në punët tona të brendshme.

Kur janë në opozitë, qeveria na bllokoi integrimin.

Kur janë në pushtet, BE-ja ka problemet e veta.

Kur janë në opozitë, kërkojnë zgjidhje për çështjet lokale.

Kur janë në pushtet, flasin për gjeopolitikën globale.

Kur janë në opozitë, pushteti i gjatë është regjim.

Kur janë në pushtet, është besim popullor.

Kur janë në opozitë, mandatet janë të përkohshme.

Kur janë në pushtet, misioni i tyre është historik.

Kur janë në opozitë, thonë se pushteti duhet t’i shërbejë vendit.

Kur janë në pushtet, janë të bindur se vendi u përket atyre.