Me afrimin e festave të fundvitit, lulet e Krishtlindjeve kanë nisur të zbukurojnë shtëpitë, dyqanet dhe ambientet publike, duke krijuar një atmosferë festive dhe plot ngjyra. Ato janë kthyer në një element të pandashëm të dekorit të kësaj periudhe.
Më e kërkuara gjatë kësaj kohe mbetet “Ylli i Krishtlindjes” (Poinsettia), me gjethet e kuqe karakteristike që simbolizojnë gëzimin, dashurinë dhe begatinë. Kjo lule konsiderohet simbol i vetë festës së Krishtlindjeve.
Krahas saj, interes të madh po zgjojnë edhe holli me kokrrat e kuqe, bredhat dekorativë, si dhe orkidetë e bardha, të cilat përdoren gjithnjë e më shpesh si dhuratë për të afërmit dhe miqtë.
Floristët tregojnë se kërkesa për lulet festive rritet ndjeshëm në ditët para Krishtlindjeve, ndërsa këshillojnë qytetarët që t’i mbajnë në ambiente të ndriçuara dhe larg burimeve të nxehtësisë për t’i ruajtur sa më gjatë.
Përveç zbukurimit, lulet e Krishtlindjeve sjellin ngrohtësi, gjallëri dhe një ndjenjë bashkimi në familje, duke e bërë atmosferën festive edhe më të veçantë.
Dhimbja e kokës nga dielli i fortë, pse ndodh dhe si ta lehtësoni gjatë ditëve të nxehta
