Mes shumë urimeve nga mbarë bota, nuk mund të mungonte ai i bashkëshortes së tij, Alisa Jalize. Ajo ka zbritur në fushë bashkë me djalin, duke festuar me Gjimshitin, i cili i ka dhuruar një puthje e më pas ka luajtur edhe me djalin. Një festë mëse e ligjshme për kapitenin shqiptar, i cili disa vite më parë u paragjykua jo pak sepse ishte lidhur me një vajzë me origjinë serbe.

Alisa e ka mbështetur gjatë gjithë kohës Beratin dhe kulmi arriti mbrëmjen e së 22 majit, ku si kapiten i Atalantës ai ngriti në fund trofeun e Europa League. Tani një tjetër mision i vështirë e pret Gjimshitin, të udhëheqë Shqipërinë në Kampionatin Europian si kapiten i Kombëtares.

Në kulim e karrierës së tij, ky trofe ishte “qershia mbi tortë”, për më tepër me shiritin në krah. Për Berat Gjimshitin kjo është një ëndërr, një sukses i jashtëzakonshëm që i jep më shumë ngjyra këtij sezoni fantastik, ku vetëm pak ditë më parë humbën një tjetër finale, atë kundër Juves. Qendërmbrojtësi kuqezi nuk i fshehu emocionet për këtë sukses, ndërsa zbuloi se vetëm pak përpara finales kishte mësuar se do të ishte ai kapiteni:

“Është e vështirë të gjesh fjalët tani, nuk po arrij ta kuptoj se çfarë kemi realizuar. Është një sukses kaq i madh, për më tepër pas finales së humbur, është e pabesueshme pasi morali i ekipit nuk ishte aq i mirë. Tani as që më bëhet vonë për tre finalet që kam humbur”, u shpreh Gjimshiti duke vijuar:

“Jam shumë krenar, vetëm përpara ndeshjes e mësova që do të isha kapiten, por ky është një grup fantastik. Ndaj Leverkusen nuk kishte fare histori, luajtëm mirë dhe e merituam fitoren”, theksoi Gjimshiti duke u rikthyer më pas në kohë, në momentin kur erdhi tek Atalanta:

“Nuk do ta kisha imagjinuar kurrë. Kur erdha këtu situata ishte ndryshe, pritshmëritë ishin të tjera, luhej për të mbijetuar. Ardhmja e Gasperinit transformoi gjithçka. Pas disa viteve nisa të ëndërroja momente të tilla, mbase jo Europa League, por për Kupën e Italisë. Kemi kaluar edhe momente negative, por tani e merituam këtë trofe”, u shpreh ndër të tjera kapiteni Gjimshiti. /ZOOM.AL/