Ditët pas ndarjes nga jeta të diplomatit të njohur Ilir Shqina kanë qenë të mbushura me dhimbje për familjen, miqtë dhe kolegët e tij të shumtë.
Sot, një reagim i ndjerë nga i biri i tij ka prekur zemrat e shumë njerëzve, duke ndriçuar edhe më shumë figurën e një njeriu që ka lënë pas një trashëgimi të pasur shpirtërore dhe profesionale.
“Kanë kaluar disa ditë që nga ndërrimi nga jeta e babait tim madhështor, Iliri Shqinës,” shkruan djali i tij në një mesazh publik plot emocione. “Prita për ta lënë mendjen të qetësohet dhe për t’i lënë dhimbjes kohën e vet të nevojshme.”
Ai e përshkruan të atin si një figurë qendrore në jetën e tij, një mbështetje e palëkundur dhe një udhërrëfyes i përhershëm:
“Babi, ti je përgjithmonë! Ndjej thellë boshllëkun e humbjes tënde fizike, por ti qëndron me mua dhe je mbrojtësi im.”
Në rrëfimin e tij, djali përkujton me krenari dhe mall ndikimin që Ilir Shqina ka pasur në formimin e tij si njeri:
“Ke farkëtuar tek unë forcat më të nevojshme për jetën… më ke treguar mrekullitë e studimeve, arritjeve dhe historisë njerëzore, që tani i mbaj si pjesë të identitetit tim.”
Ndër të tjera, ai ndalet edhe te pasioni dhe përkushtimi i babait të tij për diplomacinë, një fushë ku Ilir Shqina ka dhënë një kontribut të çmuar për përparimin ndërkombëtar të Shqipërisë.
“Ke balancuar drejtësinë me interesat dhe ke mirëkuptuar njerëz në vendet më të rëndësishme të botës.”
Mes dhimbjes, rrjedh edhe një ndjesi qetësie dhe mirënjohjeje:
“Tani je në një vend më të mirë… më shikon mua duke ecur përpara, dhe e kupton që edhe pa prezencën tënde fizike, unë do të jem mirë dhe ne do të jemi mirë.”
Reagimi mbyllet me një premtim të heshtur, një lidhje që sfidon kohën dhe largësinë:
“Do të më drejtosh në një botë që e njihje më mirë se shumëkush… Je gjithmonë i imi dhe gjithmonë do të të dua!”
Homazhet për gazetarin Enrik Mehmeti, Aurela Gaçe me lot në sy: Do e mbaj premtimin
