Flakët që nisën nga Kakodhiqi drejt Delvinës ndezën alarmin mbrëmjen e djeshme, duke iu afruar rrezikshëm puseve të gazit dhe kondensatit, një vendburim strategjik për energjinë e vendit.
Në operacionin e shuarjes u angazhuan forcat zjarrfikëse të bashkive të jugut, trupa të ushtrisë, helikopterë emergjencash dhe dhjetëra vullnetarë.
Era e fortë dhe terreni i pjerrët e vështirësuan ndërhyrjen, ndërsa mbrojtja e puseve mbeti prioritet kryesor.
Por situata ndryshoi sërish. Aktualisht zjarri po rrezikon puset e gazit në lagjen Kasapaj. Forcat zjarrfikëse e kanë përqëndruar punën në këtë lagje për të vënë nën kontroll flakët.
Gjatë natës, tymi dhe flakët rrethuan Delvinën, duke shkaktuar asfiksi te rreth 10 persona, përfshirë katër ushtarë, që u trajtuan në një spital të përkohshëm të ngritur në Kinoteatër.
Katër banesa u dogjën dhe kalaja e Xhermahallës, monument kulture, pësoi dëmtime të rënda. Nga tre lagje të qytetit u evakuuan mbi 1,000 banorë, kryesisht të moshuar dhe fëmijë.
Spitali i Delvinës rifilloi funksionimin normal në mëngjes, duke trajtuar të sëmurë kronikë, të asfiksuar, të traumatizuar dhe të lënduar nga flakët. Bagëtitë në disa zona u lanë të lira, ndërsa banorët ndihmonin ekipet në terren me ujë dhe ushqime.
