Arrestimi i presidentit të Venezuelës Nicolás Maduro nga autoritetet amerikane ka shkaktuar reagime të forta në Moskë, ku Kremlini e ka cilësuar operacionin si një shkelje flagrante të së drejtës ndërkombëtare dhe një akt që minon rendin global.
Zyrtarisht, autoritetet ruse kanë dënuar ashpër ndërhyrjen e SHBA-së në Venezuelë, duke e konsideruar atë një precedent të rrezikshëm. Megjithatë, përtej deklaratave publike, në qarqet pro-Kremlinit është vënë re edhe një ton reflektues, madje në disa raste edhe admirim i fshehtë për shpejtësinë dhe efikasitetin e operacionit amerikan.
Kanale dhe figura të afërta me establishmentin rus kanë komentuar se aksioni i Uashingtonit përfaqësonte pikërisht skenarin e një ndërhyrjeje të shpejtë dhe vendimtare, të cilin Moska kishte imagjinuar për Ukrainën në vitin 2022, por që u shndërrua në një konflikt të gjatë dhe të kushtueshëm.
Zëra pro-luftës në Rusi kanë vënë hapur në dyshim planifikimin e operacionit në Ukrainë, duke krahasuar dështimin rus me arrestimin e shpejtë të Maduros brenda pak orësh. Madje, disa figura publike pranë Kremlinit kanë shprehur “turp” përballë asaj që e konsiderojnë paaftësi strategjike të Moskës.
Analistët theksojnë se, pavarësisht retorikës së fortë, Rusia kishte pak mundësi reale për të ndihmuar Venezuelën. E angazhuar thellësisht në luftën në Ukrainë dhe me aleatë të tjerë të dobësuar në Siri dhe Iran, Moska ka zbuluar kufijtë e ndikimit të saj global.
“Operacioni u krye me kompetencë”, shkroi kanali pro-Kremlinit në Telegram, Dva Mayora, i cili ka lidhje të ngushta me ushtrinë ruse.
“Me shumë mundësi, kjo është pikërisht mënyra se si duhej të zhvillohej ‘operacioni ynë special ushtarak’ i shpejtë, dramatik dhe vendimtar. Është e vështirë të besohet se [Valery] Gerasimov planifikoi të luftonte për katër vjet”, shtoi ajo, duke iu referuar shefit të shtabit të përgjithshëm të Rusisë.
Sipas ekspertëve, prioriteti absolut i Vladimir Putinit mbetet Ukraina, ndërsa ruajtja e një raporti funksional me Donald Trump konsiderohet më e rëndësishme sesa fati i regjimit në Karakas. Për këtë arsye, Kremlini ka zgjedhur të kufizohet kryesisht në reagime diplomatike dhe deklarata politike.
Megjithatë, humbja e Venezuelës pritet të ketë pasoja konkrete për Rusinë, sidomos në aspektin ekonomik dhe energjetik. Një qeveri pro-amerikane në Karakas mund t’i hapë rrugë SHBA-së drejt rezervave të mëdha të naftës venezueliane, duke ushtruar presion mbi çmimet globale dhe, rrjedhimisht, mbi të ardhurat ruse.
Po ashtu, ekziston shqetësimi se teknologjia ushtarake ruse e furnizuar prej vitesh në Venezuelë mund të përfundojë në duart e specialistëve amerikanë, ndërsa miliarda dollarë kredi të dhëna nga Moska rrezikojnë të mos rikuperohen kurrë./ Zoom.al
ARRSH hap tenderin 5.24 milionë euro për lidhjen e Unazës Verilindore me Rrugën e Arbërit
