Shqipëria pritet të hyjë në një periudhë tipike verore me temperatura të larta që në ditët e para të qershorit, ndërsa masat e nxehta me origjinë afrikane do të ndikojnë drejtpërdrejt në klimën e vendit.
Sipas sinoptikanes Lajda Porja, fundi i muajit maj ka sjellë vetëm fillimin e një vale të gjatë të nxehti, e cila do të vazhdojë të forcohet gradualisht gjatë javëve në vijim. Temperaturat në javën e parë të qershorit do të luhaten rreth 32 deri në 34 gradë Celsius, ndërsa pas datës 5 qershor pritet një rritje e mëtejshme.
Meteorologët parashikojnë se termometri mund të arrijë deri në 35–36 gradë Celsius, duke e bërë këtë periudhë një nga fillimet më të nxehta të verës në vitet e fundit.
Megjithatë, moti nuk do të jetë krejtësisht i qëndrueshëm. Prania e nxehtësisë së fortë do të krijojë kushte për zhvillim vranësirash, të cilat në disa zona do të sjellin reshje të shkurtra dhe të izoluara shiu, kryesisht në orët e pasdites.
“Javën e parë të qershorit temperaturat do të jenë rreth 33–34 gradë. Pas datës 5 pritet një rritje graduale deri në 35–36 gradë. Këto masa të nxehta afrikane do të jenë të pranishme gjatë gjithë verës, me ndërprerje të shkurtra”, tha Porja në Ora News./ Zoom.al
Hodhi ujë drejt Ramës, përjashtohet nga seanca Gazment Bardhi
