“Mendova se vëllai im i vogël ishte brenda, kështu që erdha dhe u përpoqa të thyeja dritaren për të ndihmuar njerëzit të dilnin, dhe pas kësaj hyra brenda.”
18-vjeçari, i cili nuk donte të idetifikohej, foli për BBC-në pasi një zjarr i madh në një festë të Vitit të Ri në vendpushimin zviceran të Crans-Montana e shndërroi shpejt atë që ishte një mbrëmje festimi në një makth.
Policia thotë se dhjetëra njerëz supozohet të kenë vdekur kur flakët shpërthyen në një bar të quajtur Le Constellation rreth orës 01:30 sipas orës lokale të enjten. Rreth 100 të tjerë u plagosën, kryesisht me djegie të rënda.
Dëshmitari okular i tha BBC-së se ishte afër barit kur dëgjoi një shpërthim të madh, të ndjekur nga shumë tym.
Ndërsa të tjerët përpiqeshin të shpëtonin, ai hyri brenda, duke kërkuar vëllain e tij. Pasi hyri brenda, ai përshkroi një skenë tmerri.
“Pashë njerëz duke u djegur… Gjeta njerëz duke u djegur nga koka te këmbët, pa rroba,” tha ai, duke shtuar: “Ishte shumë tronditëse.”
Vëllai i tij nuk u lëndua.
“Shkoja në këtë bar çdo ditë, por ditën që nuk shkova, u dogj,” tha ai.
Zjarrfikësit dhe mjekët morën shpejt kontrollin, tha ai, por u përpoq të ndihmonte ku të mundte, duke ofruar ujë dhe rroba për të plagosurit.
Le Constellation është një bar i madh me hapësirë për rreth 300 persona të shpërndarë në dy kate dhe një tarracë, megjithëse nuk dihet se sa njerëz ishin në bar në atë kohë.
Dy gra franceze, Emma dhe Albane, i thanë medias franceze BFMTV se ishin brenda kur filloi zjarri.
Ato thanë se besonin se filloi kur një kamariere vendosi “qirinj ditëlindjeje” sipër disa shisheve të shampanjës.
“Brenda pak sekondash, i gjithë tavani u përfshi nga flakët. Gjithçka ishte bërë prej druri”, thanë ato, duke shtuar se flakët “filluan shumë shpejt”.
