Vllaznia rikthehet te fitorja pas thuajse një muaji, teksa triumfon me rezultatin 0-2 në transfertën korçare ndaj Skënderbeut, një sfidë ku duhet theksuar se vuajtën jo pak.

Korçarët e nisën mirë takimin, por mbetën me 10 futbollistë që në minutën e 34-t, kur Prenci u ndëshkua me karton të kuq, për një faull ndaj Grudës, si lojtari i fundit në mbrojtjen e Skënderbeut.

Skuadra e Gvozdenovic rezistoi deri në minutën e 82-të, kur Randi Dwumfour devijoi në mënyrë të pafat topin në rrjetën e portës së tij, duke u dhënë avantazhin kuqebluve.

Në minutën e pestë shtesë ishte Delaj që shënoi golin e parë me fanellën kuqeblu dhe të dytin për Vllazninë, që largohet nga Korça me një 3-pikësh mjaft të rëndësishëm për të rikthyer qetësinë në një ambient të trazuar jo pak në javët e fundit në Shkodër. /zoom.al/