Kryeministri Edi Rama ka bërë të ditur gjatë një takimi me strukturat e Partia Socialiste e Shqipërisë në Tiranë se qeveria do të marrë një nismë të re që lidhet me mbulimin e sigurimeve shoqërore për prindërit që kujdesen për fëmijët me aftësi ndryshe, duke e paraqitur si një angazhim të ekzekutivit që do të formalizohet në muajt në vijim.
Sipas deklaratës së tij, shteti do të paguajë kontributet shoqërore për prindërit ose kujdestarët që janë të detyruar të qëndrojnë në shtëpi për shkak të kujdesit të vazhdueshëm ndaj fëmijëve me nevoja të veçanta, duke filluar nga një akt i ardhshëm normativ.
Rama shtoi gjithashtu se po shqyrtohet edhe rritja e mbështetjes financiare për këto familje, duke e cilësuar këtë si një ndërhyrje të vonuar, por të domosdoshme sociale.
Megjithatë, kjo nismë nuk është e re në diskutimet parlamentare. Ajo është prezantuar më herët në Kuvend nga deputetja e opozitës Jorida Tabaku, e cila ka propozuar njohjen e viteve të sigurimeve dhe kontributeve për prindërit kujdestarë, si pjesë e një projektligji të hartuar pas konsultimeve me organizatat e shoqërisë civile.
Vetëm një ditë më parë, Tabaku ka vijuar argumentimin e nismës në komisionet parlamentare, duke deklaruar se kjo kategori përballet me mungesë të mbështetjes reale financiare dhe se kujdesi për fëmijët me aftësi ndryshe përbën një angazhim të plotë që duhet të njihet edhe në aspektin e pensioneve.
Duke iu referuar të dhënave, Tabaku theksoi se aktualisht janë rreth 15 mijë përfitues që përfshihen në kategorinë e sindromës Down dhe spektrit të autizmit, ndërkohë që mbështetja financiare për kujdestarët mbetet minimale. “Pagesa prej 14 mijë lekësh në muaj është qesharake dhe nuk garanton as minimumin e nevojshëm. Ky grup ka nevojë për një sistem mbështetës real dhe një infrastrukturë të mirë menduar”, theksoi ajo.
Sipas kësaj qasjeje, qeveria ka marrë një ide të diskutuar më herët në Kuvend dhe e ka prezantuar si pjesë të paketës së saj sociale, duke zhvendosur autorësinë e propozimit nga nisma e opozitës te një vendim ekzekutiv.
Në këtë kontekst, deklarata e kryeministrit është parë si një ripaketim i një nisme që tashmë ndodhet në shqyrtim parlamentar, duke e zhvendosur fokusin nga propozimi i opozitës te një iniciativë qeveritare./ Zoom.al
