Karteli Cela-Çopja kontrabandoi miliarda paund kokainë nga Amerika Latine në Europë…
Klanet Cela-Çopja ishin një nga sindikatat më të fuqishme kriminale në Europë, vendimet e të cilave diktonin çmimin e kokainës në të gjithë kontinentin. Të orkestruar nga udhëheqësit e saj, Franc Çopja, 33 vjeç, dhe Ervis Cela, 41 vjeç, banda shqiptare kontrabandoi miliarda paund kokainë nga Amerika Latine në portet e BE-së. Më pas ajo pastronte asetet përmes një perandorie të gjerë tregtare që përfshinte toka të gjera me pasuri të paluajtshme, një resort turistik pesë yje, vila dhe apartamente.
Bosët e drogës grumbulluan sasi aq të mëdha parash saqë edhe grindeshin nëse ishte më mirë t’i fshihnin banknotat nën rrënjët e ullinjve apo t’i shndërronin në shufra ari. Por brenda pak ditësh, karteli pa se operacioni i tij u shkatërrua me Çopjën dhe Çelën të arrestuar së bashku me togerët e tyre kryesorë dhe me asetet e sekuestruara nga SPAK – task-forca shqiptare kundër korrupsionit dhe krimit të organizuar.
Në mars 2021, hetuesit depërtuan në Sky ECC, një shërbim mesazhesh të koduara, duke nxjerrë në dritë krimet e tyre të dyshuara. Cela, i cili ishte i kërkuar në Itali për torturimin dhe vrasjen e një tutori rival shqiptar, u arrestua së bashku me dy vëllezërit e tij dhe tetë bashkëpunëtorë të tjerë në një sërë aksionesh rrufe në qershor dhe gusht. Çopja ishte arrestuar në Belgjikë në dhjetor 2023 dhe është në gjyq për vrasje pas ekstradimit nga vila e tij në Dubai. Ai konsiderohet si truri logjistik i operacionit, duke siguruar transferimin e kokainës përmes porteve në Europën veriore.
“Ky organizim kriminal mund të konsiderohet si një nga organizatat shqiptare më të fuqishme në tregtinë ndërkombëtare të kokainës”, thanë në një deklaratë të përbashkët prokurorët Altin Dumani dhe Vladimir Mara. “Ai kishte kapacitetin të ndikonte drejtpërdrejt në çmimin e kokainës në tregjet europiane dhe të menaxhonte sasi të mëdha të substancës narkotike në periudha të shkurtra kohe,” shtuan ata.
Thuhet se karteli kontrollonte të gjithë zinxhirin e trafikut të kokainës – nga prodhimi dhe përpunimi në laboratorë në Paraguai, te transporti ndërkombëtar dhe shpërndarja në tregjet europiane, dhe në fund tek pastrimi dhe qarkullimi i fitimeve të paligjshme në Shqipëri dhe vende të tjera. Një pjesë e kokainës së grupit besohet se është trafikuar përtej Kanalit Anglez drejt Britanisë, ku, sipas Agjencisë Kombëtare të Krimit, bandat shqiptare kontrollojnë një pjesë të konsiderueshme të tregut fitimprurës. Një kilogram kokainë në Britani vlerësohet rreth 40 mijë £ krahasuar me 20 mijë £ në Europë.
Sipas Europol-it, agjencia policore e Europës, Sky ECC përdorej gjerësisht për qëllime kriminale, përfshirë trafikun e drogës, pastrimin e parave dhe shpërndarjen e materialeve të abuzimit seksual me fëmijë. Edhe pse Sky ECC është mbyllur, qindra miliona mesazhe të koduara mbeten të disponueshme dhe janë ekzaminuar nga autoritetet ligjzbatuese në të gjithë Europën dhe më gjerë për vite me radhë.
Një aktakuzë 282-faqëshe e lëshuar më 8 gusht nga SPAK, e parë nga The Telegraph, zbulon se si banda dyshohet se ka tentuar të transportojë 28 ton kokainë të fshehur në kuti sapuni, kanaçe boje ose ngjitësi industrial nga Paraguai në portet e Hamburgut dhe Antwerp-it midis 2020 dhe 2021.
Më 12 shkurt 2021, 16.4 ton kokainë me pastërti të lartë, të fshehura në 1,700 kanaçe me llaç muri, me një vlerë në rrugë prej 3 miliard £, u sekuestruan në porte dhe ishte, në atë kohë, kapja më e madhe e kokainës në historinë e Europës. Një ngarkesë tjetër, e cila kaloi me sukses në portin e Antwerp-it në vitin 2020, vlente 1.3 miliard £.
Grupi zhvilloi një sistem të sofistikuar për transferimin e fitimeve nga trafiku i drogës nga Europa në Shqipëri, duke përfshirë përdorimin e korrierëve për transferime me para dhe një rrjet të quajtur “hawala”, duke mundësuar qarkullimin e qindra milionë eurove në para të gatshme.
Cela thuhet se ka orkestruar operacionin ndërkohë që ishte në arrati në Paraguai. Në një bisedë më 12 dhjetor 2020, Cela i tha Çopjës se planifikonte të fshihte eurot nën rrënjët e ullinjve të tij në Shqipëri. Megjithatë, Çopja e paralajmëroi se banknotat do të kalbeshin nën tokë dhe e nxiti t’i kthente ato në ar.
Cela u përgjigj: “Nuk ka ar… më duhet të grabis një bankë… më duhet ta porosis nga Afrika.”
Çopja tha: “Njoh dikë që mund ta sigurojë [arin] për ne.”
“Pyete, çfarëdo që ka, 100/200 kilogramë,” iu përgjigj Cela.
Biseda më pas kaloi te orët luksoze dhe tokat bujqësore. Pasdite, Cela paraqiti planet për të blerë dy ferma për 10 milion £ në Paraguai, një investim që, sipas tij, do të sillte 1.8 milion £ në vit.
Në një bisedë të veçantë me vëllain e tij në Sky ECC në nëntor 2020, Cela shkroi se 800 mijë £ të detyruara nga një prej trafikantëve të tyre ishin vonuar “për shkak të një rënieje në tregun britanik”.
Cela kishte kaluar 11 vjet në arrati para se të arrestohej në fshatin bregdetar të Qeparos në bregun jugor të Shqipërisë më 29 qershor. Së bashku me vëllain e tij Ardian dhe bashkëpunëtorin Hiseni Fatos, ai ishte dënuar në Itali për vrasjen e Petrit Keçit në shtator 2008, i cili kishte tentuar të hynte në tregun e prostitucionit të grupit në San Benedetto del Tronto.
Trioja u dënua për rrahjen e Keçit dhe qëllimin e tij gjashtë herë në kokë përpara se të digjnin trupin për të fshehur krimin. Cela u dënua me 30 vjet burg. Vëllai i tij mori 18 vjet. Megjithatë, ata arritën të apelonin vendimin dhe u mbajtën në paraburgim, por afati i paraburgimit skadoi përpara se të rikonfirmoheshin dënimet dhe ata u liruan në maj 2014, duke u dhënë mundësinë të arratiseshin jashtë dhe të humbnin gjurmët në botën e krimit.
Tani Cela do të duhet të vuajë një dënim 21-vjeçar për vrasje, rrëmbim, tentativë për fshehje trupi, kërcënime, posedim të paligjshëm eksplozivësh dhe municionesh si dhe pengim të drejtësisë, përveç çdo dënimi që mund të marrë për trafikun e drogës dhe veprat e tjera përkatëse.
Një nga asetet më të spikatura të bandës ishte resorti luksoz Ajman Park, 27 km në perëndim të Tiranës. Një nga asetet më të spikatura të sekuestruara nga SPAK ishte resorti luksoz “Ajman Park” në Shijak, një qytet 27 kilometra në perëndim të kryeqytetit Tiranë. Në faqen e tij ende aktive, hoteli ofron “siguri 24 orë” për ata që dëshirojnë të marrin me qira “Marvel Palace” në stil greko-romak për ceremoni martesash ose të darkojnë në restorantin e tij Sushi dhe Steakhouse.
Sekuestrimet shënuan një ndërhyrje të rrallë nga autoritetet shqiptare, të cilat pothuajse kurrë nuk kanë nisur hetime mbi origjinën e kapitaleve në shkallë të gjerë që derdhen në sektorët e turizmit dhe ndërtimit në vend. /Nga Besar Likmeta për “The Telegraph”
Labi premtoi 150 euro për Roelin nga çdo event, shpërthen Rezart Veleshnja: Shpati nuk lypi kurrë
