Familjet që marrin ndihmë ekonomike dhe personat me aftësi të kufizuara do të përfitojnë një bonus fundviti prej 15 mijë lekësh, ose rreth 150 euro.
Ministri i Financave, Petrit Malaj tha sot se përfitues janë rreth 148,500 qytetarë, duke përfshirë edhe kujdestarët e tyre, me një fond total prej 2.2 miliardë lekësh.
Malaj, bëri të ditur po ashtu se 15 miliardë lekë të papërdorura nga institucionet do të kalojnë në Fondin e Veçantë të Pensioneve pranë Bankës së Shqipërisë, për të mbështetur reformën e re të pensioneve.
Përveç kësaj, sektori i shëndetësisë do të marrë 1.8 miliardë lekë shtesë për furnizimin me medikamente, ndërsa bujqësia do të përfitojë 2 miliardë lekë për pagesat e fermerëve që marrin mbështetje nga skemat kombëtare. Fondi total për fermerët këtë vit arrin në 6.4 miliardë lekë, krahasuar me 5.3 miliardë lekë vitin e kaluar.
Rishikimi i buxhetit përfshin gjithashtu edhe 1.2 miliardë lekë për të mbuluar detyrimet e papaguara të pushtetit vendor, që përfaqëson rreth 40% të borxheve të prapambetura të bashkive./ Zoom.al
