Medon Berisha do të mungojë për pesë deri në gjashtë javët e ardhshme, pas dëmtimit të pësuar në ndeshjen kundër Pisa-s.
Lojtari u detyrua të largohej shumë shpejt nga fusha për shkak të një dëmtimi muskulor dhe u transportua me barelë, duke shkaktuar shqetësim te stafi dhe tifozët. Sipas rezultateve të ekzaminimeve mjekësore të publikuara nga klubi verdhekuq, Berisha ka pësuar një dëmtim muskulor të shkallës së dytë, që do ta mbajë jashtë fushave për të paktën 45 ditë.
Kjo do të thotë se mesfushori do të rikthehet në dispozicion jo më herët se muaji shkurt i vitit të ardhshëm. Për pasojë, Medon Berisha do të mungojë në disa sfida të rëndësishme, duke përfshirë ndeshjet ndaj Comos, Juventusit, Romës, Parmës, Interit, Milanit, Lazios dhe Torinos. Ky dëmtim vjen në një moment shumë pozitiv për futbollistin shqiptar, i cili ishte shndërruar në një titullar të padiskutueshëm të skuadrës italiane.
Para ndërprerjes së detyruar, Berisha kishte fituar tre herë çmimin “Lojtari i Ndeshjes” në Serie A, duke dëshmuar formën e tij të shkëlqyer dhe rëndësinë për ekipin. Mesfushori i Kombëtares shqiptare ka zhvilluar 13 nga 15 ndeshjet e këtij sezoni, duke kontribuar me 2 gola dhe 3 asistime, statistika që e rendisin ndër lojtarët më efektivë të klubit puljez. Gjithsesi, talenti 22-vjeçar do të jetë i gatshëm për trajnerin Sylvinho në ndeshjet play-off të kombëtares shqiptare në rrugën drejt Kupës së Botës 2026.
Zoom.al/
