Mojtaba Khamenei është shpallur udhëheqësi i ri suprem i Iranit, pas vdekjes së babait të tij, Ali Khamenei, i cili sipas raportimeve humbi jetën gjatë sulmeve të para të koordinuara nga Shtetet e Bashkuara të Amerikës dhe Izraeli kundër Iranit.
Mediat shtetërore iraniane raportojnë se vendimi për emërimin e tij është marrë nga Asambleja e Ekspertëve, institucioni me 88 anëtarë që ka kompetencën kushtetuese për të zgjedhur liderin suprem të Republikës Islamike.
Mojtaba Khamenei, 56 vjeç, është klerik dhe deri më tani nuk ka mbajtur pozicione zyrtare në qeverinë iraniane. Megjithatë, ai konsiderohej prej kohësh një figurë me ndikim brenda strukturave politike dhe fetare të vendit.
Në sistemin politik të Iranit, udhëheqësi suprem është autoriteti më i lartë shtetëror. Ai ka fjalën përfundimtare në vendimet kryesore të vendit, përfshirë politikat e brendshme, strategjinë ushtarake dhe çështjet fetare.
Sipas rregullave të Republikës Islamike, ky post duhet të mbahet nga një figurë me autoritet të rëndësishëm fetar dhe ndikim të madh politik.
Emërimi i Mojtaba Khameneit pritet të ketë ndikim të rëndësishëm në zhvillimet politike të Iranit, veçanërisht në një moment tensionesh të larta në Lindjen e Mesme dhe përshkallëzimi të situatës mes Iranit, Izraelit dhe Shteteve të Bashkuara./ Zoom.al
ARRSH hap tenderin 5.24 milionë euro për lidhjen e Unazës Verilindore me Rrugën e Arbërit
