Ministria e të Drejtave Sociale e Spanjës i ka kërkuar zyrës së prokurorit të vendit të hetojë sulmuesin e krahut të Barcelonës, Lamine Yamal, pasi thuhet se ai ka punësuar persona me nanizëm për të performuar në festën e tij të 18-të të ditëlindjes.
Lamine Yamal organizoi një festë të dielën në një pronë me qira në Olivella, një qytet i vogël 50 kilometra në veriperëndim të Barcelonës, me të ftuar që përfshinin YouTuberë, influencues dhe disa shokë skuadre të Barcelonës.
Pretendohet se Lamine Yamal ka punësuar një grup argëtuesish me nanizëm, diçka që Shoqata ADEE e përshkroi si “të papranueshme në shekullin e 21-të”.
ADEE tha se “denoncon publikisht punësimin e tyre si pjesë të argëtimit” dhe tha se do të ndërmarrë veprime ligjore pasi kjo “përjetëson stereotipet, nxit diskriminimin dhe minon imazhin dhe të drejtat” e personave me aftësi të kufizuara.
Në një deklaratë, ajo tha: “Këto veprime shkelin jo vetëm legjislacionin aktual, por edhe vlerat themelore etike të një shoqërie që kërkon të jetë egalitare dhe respektuese. “Ligji i përgjithshëm mbi të drejtat e personave me aftësi të kufizuara ndalon shprehimisht praktikat e mëposhtme: ‘Shfaqjet ose aktivitetet rekreative në të cilat personat me aftësi të kufizuara ose rrethana të tjera përdoren për të provokuar tallje, përqeshje ose përbuzje nga publiku në një mënyrë që bie ndesh me respektin e duhur për dinjitetin njerëzor janë të ndaluara’.”
