Homeland Justice ka pretenduar se ka kryer një sulm kibernetik ndaj sistemeve të drejtësisë në Shqipëri.
Sipas hakerave, janë siguruar të dhëna dhe dokumente të ndjeshme nga Gjykata e Lartë e Shqipërisë dhe Prokuroria e Përgjithshme e Shqipërisë. Megjithatë, këto pretendime janë hedhur poshtë nga vetë institucionet.
Në një reagim zyrtar, Gjykata e Lartë sqaroi se nuk ka pasur asnjë ndërhyrje në sistemet e saj të brendshme apo në faqen zyrtare. Sipas saj, referuar edhe pretendimeve të hakerave, mund të jetë prekur vetëm faqja “gjykata.gov.al”, e cila administrohet nga Këshilli i Lartë Gjyqësor, dhe nuk ka lidhje direkte me sistemet e brendshme të gjykatës.
Edhe Prokuroria e Përgjithshme bëri me dije se, pas verifikimeve të kryera nga specialistët e sigurisë kibernetike, nuk janë konstatuar shenja komprometimi apo hakerimi. Institucioni theksoi se monitorimi i situatës vijon në mënyrë të vazhdueshme për të garantuar sigurinë e të dhënave.
Pak ditë më parë, Homeland Justice sulmoi edhe sistemet e Postës Shqiptare dhe të Kuvendit të Shqipërisë./ Zoom.al
